قصيدة رقم 1
نزله
كوموا يهل الغيره وي غريب الديره
حسين وحده بكربله وبس احنه الانصار
____________
كوموا لحسين الغريب امشونه
وبعد بلكافل نمر خلونــــــــــه
رخصه نطلب بلجن يرخصونه
نريد ابو اليمه نقاتل دونــــــــه
احنه احنه انصاره احنه باول غاره
حسين وحده بكربله وبس احنه االانصار
_______________________
واكف يحشم غريب اوطانها
كوموا هدوا الخيل من اعنانها
كوموا كلبوا كربلاء بوديانها
كبل مايذبحون كل رضعانها
شنعتذر هلمره تدري بينه الزهره
حسين وحده بكربله وبس احنه االانصار
________________________
كوموا خلنوصل لعد ام الخدر
نكله احنه احبابج واحنه الستر
نقسم بضلع امج الي المنكسر
مايصل يازينب خيامج شمر
سيوف سليناها ارواحنه وبعناها
حسين وحده بكربله وبس احنه االانصار
________________________
كوموا شدوا الحيل شدوها الحزم
خلوا غيرتكم على اجتاف العزم
كوموا للحومه نطبها يازلـــم
من اهل كوفان كوموا ننتقم
اليوم كلمن زوده والركاب شهوده
حسين وحده بكربله وبس احنه االانصار
_______________________
كوموا ومشونه لحبيب القائد
الرايه زمها وخلنروح انجاهد
كوموا شدوا الساعد اعله الساعد
مانريد اليبقه بلطف كاعد
هذا يوم المرجله والنصر بارض العلا
حسين وحده بكربله وبس احنه االانصار
___________________________
كوموا خلندك الحديد عله الحديد
غيمه صيروا وساعقه وبرق ورعيد
كوموا خلوا اعلومكم توصل يزيـــــــد
روسهم دزوها للشام البريــــــــــــــد
والبريد اعلومكم يانشامه ويومكم
حسين وحده بكربله وبس احنه االانصار
_____________________
السيد كريم دانه الاعرجي
قصيدة رقم 2
نزله
لــبـيــك .. لــبـيــك .. ابــا عــبــد الله
لــبـيــك .. لــبـيــك .. ابــا عــبــد الله
_________________
التلـبيه الصرخه الوحيده البـسمك انعـليها
نـرعب اگلـوب ال امـيـه والـدواعش بـيها
عالـسواتـر بالمـعارك احــنه مــن نحچــيها
اي وحــق سـتر العـقيله كــربـله انســويها
والــثــار .. والــثـــار .. ابــد مـاننـساه
لــبـيــك .. لــبـيــك .. ابــا عــبــد الله
_________________
احـنه يحـسين ابخدمتـك وانـتـه الـمربـينه
والله ماجـايبـته امــه الـــراد يـنــدگ بــينه
عدنـه مـاضي بالحـروب ونفـخر ابمـاضينه
سيدي الـهدد ظـريحك خل يجـي ايلاگـينه
منـخاف .. منـخاف .. ابـــــــد لاوالـله
لــبـيــك .. لــبـيــك .. ابــا عــبــد الله
_________________
ابكـل وكـت انصار عـندك سـيدي موجوده
والـي يـتجاوز حـدوه انعـلمه وين احدوده
للحـرب مـمدوده اديــنه وللــسلم ممــدوده
اي ته وزنـوده
والــــراد .. والــــراد .. حـرب حاربناه
لــبـيــك .. لــبـيــك .. ابــا عــبــد الله
_________________
همــه گــالو انـتـو قلـه واحـنه حــيل اهوايه
كون بي غيره وحمـيه اليحچي هيچ احچايه
خـل يجـي باچـر يـشـاهد مــن تــرف الرايه
نفــرك اخـشـوم ال امــيه ابــكـثرة المـشايه
والـيــوم .. الـيــوم .. اجـه الراقــبناه
لــبـيــك .. لــبـيــك .. ابــا عــبــد الله
_________________
الگــالو انــهـدم المراقد لـَمــن اسـمعـناهم
الدارهـم يحسين رحـنه وعــبـي لبـسناهم
احـنه ويـانه الكفيل وهـمـه ياهــو اوياهم
ابفـضل الله وابـو فاضل سيدي ارعـبناهم
واللـــــه .. واللـــــه .. لــواك ارفــعناه
لــبـيــك .. لــبـيــك .. ابــا عــبــد الله
_________________
النـصرتك الله خلـقـنه ونفـخـر ابهـالنـصره
المـايـقدم عمـره لجـلك شـنو قـيـمة عـمره
مـوقـفك وانتـثه وحـيد ابكــربـلاء انـذكره
مـن بـقـيت ابـلايه نـاصـر والاعـادي كـثره
حاطـوك .. حاطـوك .. عــده واويـلاه
لــبـيــك .. لــبـيــك .. ابــا عــبــد الله
_________________
احــنه لـــو ويـاك چـنـه العــده ميــبـعدونه
وصـدرك ابسـهـم المـثـلث والله ميصوبونه
والمخـيم يـبـو اليـمه اصـفوف نوگف دونه
وخـدر زينـب يخـو زينـب والله مايـصلونه
والـــدم .. والــــدم .. الــك قــدمــناه
لــبـيــك .. لــبـيــك .. ابــا عــبــد الله
_________________
تمت والحمد لله
حيدر تركي الكربلائي
قصيدة رقم 3
#فائزي
أنصارك اليوم === موعدهم الحوم
أنصارك إبسوح النصـِر === لبــّوا نداءك يابــدِر
موعدهم الحوم === أنصارك اليوم
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
يحسين أنصارك غدوا للدنيه أقمــــــار == وانت الگلت ماكو مثل أنصاري أنصار
هذا حبيب إو صولته قايدهم إو صار == يرســــم ملاحم للمجد وإبكربله الدار
قايدهـــــم إبزود === وإيضحــّي وإيجود
ويــّاهم إو نال الأجــِر === لبــّوا نداءك يابـــــــدِر
موعدهم الحوم === أنصارك اليوم
ـــــ
جون إو زهير إو كل أبي ما يقبل الضيم == عن وجهك إبهمــّه إو عزم كشفوا رَدَه الغيم
كل واحد إبعشگك غده ولهان وإيهيم == وإبكربلـــه إينال النصر للغانمه إيقيم
شيدوها الأمجاد === وإبأحلى إنشاد
ما همهم الشر والغــدِر === لبــّوا نداءك يابـــــــدِر
موعدهم الحوم === أنصارك اليوم
ـــــ
عابس رسم أصعب مثل للتضحيه إو فاز == مجنـــون صار إبلهفته بالحب ظفر حاز
أجمل رمز للحب غده إو للخير إنحاز == دنيـه حواها إو آخره من هذا الأنجاز
وأخوانه الأبرار === يانعم الأنصار
دمهم جره إو لاح الفجــِر === لبــّوا نداءك يابـــــــدِر
موعدهم الحوم === أنصارك اليوم
ــــ
والنور مافارگ وهب بالحومه من صار == راد الخلــود إو ما جزع من لهبة النار
واسى الحسين إبمهجته للآخره ســـار == وإمـــّه تريد الجايزه من حامي الجار
وإبهمــّه وإصرار === صار إمن الأطهار
رادوا لقاءك بالحشــِر === لبــّوا نداءك يابـــــــدِر
موعدهم الحوم === أنصارك اليوم
ــــ
والحر نبــَع عنده العشگ للجنــّه والحور == عــــــاف العساكر وإلتجأ للخير منصور
ناداك يحسين إبأمل دلالي مفطــــور == إقبلني تايب گـاصدك مولاي مسرور
وإقبلته يحسين === ويــّه الميامين
تحضرهم إبيوم النشــِر === لبــّوا نداءك يابـــــــدِر
موعدهم الحوم === أنصارك اليوم
ـــ
أنصارك إحنه إو ما نعوف إزيارتك دوم == وإنواجـه الشر والخطر كل لحظه كل يوم
عادت أميـــّه الغادره والشر بده إيحوم == وإنجاهد إبعزه إو شرف كل جاني مذموم
وإنصيح لبــّيك === بالروح نفديك
نتبعهم إبطيب الصــدِر === لبــّوا نداءك يابـــــــدِر
موعدهم الحوم === أنصارك اليوم
ــــــــــــــــــــــــ
مع تحيات شاعر اهل البيت / جابر النجفي
قصيدة رقم 4
#مقدمة
بينه يسولف التاريخ . احنا انصار ابو الاحرار
دور عنا كل الكون . مثلنه ماتصح انصار
**1************
سبعين العدد لكن. فنه الگدر يحسبنه
توذرنا وتطبرنا. ومحد وصل زينبنه
منه يخاف حتى الموت. اجيش الي يرهبنه
اكرام ومن طبعنه الجود. نكرم والله برگبنه
لوينه ونلوي خشم الموت. صحنا للشهاده بصوت
واحدنا بالف مليون. واكثر شاهد الاقطار
***2************
غير حسين ماعدنا. گبل كلها احنا گناهه
گبل الف وكسر واعوام. ثبتنه من حجيناها
گبل الدنيا گبل الناس. رايتنا رفعناها
علينا يشهدالعباس. محد گدر يدناها
كثره وعدد ماهمنا رتل بالحرب دمنا
كراسي الظلم هدمنا. ابحث واقزه بالأخبار
3**********************
يا ليتنا كلها تصيح . كلها تريد ويانه
الصار ويانه راح يفوز. احنه النصر قرآنه
اليريد ويانا اهلا بيه يم حسين يلاگانه
اليگصد كربلا ويزور . نتلاگاه ينخانه
ياشيعه احنا موجودين. اليدافع يبقى عن الدين
نسجل اسمه وي حسين. نحشره بزمرة الأخيار
****4************
جون ونافع الأبطال وعدنا الثائر ابن القين
وعابس بالعشگ من صاح جنني العشگ بحسين
وحبيب ومسلم الثوار. والحر تاب لجل الدين
وهب وامه الفعل والگول. وانس يتحده هالطاغين
وبرير يرتل الايات. قرآن النصر ثورات
وعابس قلئد الكلفات. نغفه بعين هالأخطار
..................5
رفعنه راية الكرار . ماتنزل تضل للدوم
احنه انصار ابو اليمه .. هاليوم ونضل كل يوم
وصيه هاي للخدام .. لازم تنصر المظلوم .
لجل الحسين فدوه الروح .. خل راسك يصب دموم
احنه انصار داحي الباب .. دمنه اعله الترب س چاب
ماخفنه ولا نرتاب ..علينه تشهد الامصار
....................
حيدرموسى الرميثي
قصيدة رقم 5
نحلف احنه براسك أي وحگ عباسك
**********
ندي ابن مرجانه فاسد مانهاب جنوده
شحده يگرب للمخيم لو يصل لحدوده
عدنه غيره حيدريه وغيرتك موجوده
اسمك اصبح للغياره ياحُسين انشوده
كلنه نصبح ساسك أي وحگ عباسك
***********
هاذي انصارك نشامه عترتك تحميهه
كلشي بالدنيه نملكه بحبك نضحيهه
نسحگ خشوم اليضدك والنفس نهديهه
كل نحر عدنه رخيصه والدمه نفديهه
بغيره نحمي ناسك أي وحگ عباسك
************
مانهاب جيوش اميه زين تعلم بينه
هالعمر ما يسوه دونك ماتفيد اسنينه
بأسمك اندوس المنيه بحبك انجنينه
نخلي حتى الموت يفزع لو سوه هبينه
انصير الك انفاسك أي وحگ عباسك
***********
ازهير وي جون اويه عابس للحرب عنايه
والحبيب ابنه مُظاهر بيده رافع رايه
مسلم ونافع تنادي انصر كلنه دمايه
احنه سبعين انتفاده وانت صرت الغايه
كل عزم من باسك أي وحگ عباسك
**************
الليله كل احنه نضحي كلشي لجل عيونك
فنّه جيش ابن الدعيه لو يصل لضعونك
حتى لو كلنه انتگطع مانخيب ظنونك
لو نفس بس واحد ايظل شنهي نفعه بدونك
احساسه من احساسك أي وحگ عباسك
**************
انته قراّن العقيده وللشريعه صوره
نصبح لضعنك حمايه واحنه نسند سوره
الليله بالهمه نخلي هالقزم مذعوره
تبقه باذن الله تلالي رايتك منصوره
تزهي من نوماسك أي وحگ عباسك
***************
نرسم بدمنه الملاحم بيهه سر افكارك
تمشي الاسنين وتعدي تنختم بانوارك
اتسلم اعلينه بدمعهه من تجي زوارك
شيعتك وبكل محرم تحيي ذكر انصارك
يضوي بيه نبراسك أي وحگ عباسك
***************
ابو لقاء البهادلي
قصيدة رقم 6
#نزلة
احنه انصار الولي احنه انصار
غيره ربانه علــي احنه انصار
فدوه لحســين الدماء اي وحك رب السماء
!!!!!!!!!!!
وحك جــــفين الكــمر نــضل انصار الطــــــهر
نذر لحــــسين العــــمر ابد ميهمنه الخــــــــطر
بعلي شدينه الــــعزم وحك عــــباس
وحك شيال العلــــم نضــــل حراس
الًيَوُمًِ تشهد كربلــــــــاء اي وحك رب السمــاء
!!!!!!!!!!!!
حسين يامرنه امــــــر ندوس لْـۆ راد الجــــمر
وحك خدر ام الخــــدر سحك نسحك عالشــمر
احنه نار ونصــــــطلي ما يهم مــــــــوت
حسين قائدنه بلــــــي يضل هالصــــوت
كلنه نطــــــــلع للفداء اي وحك رب الســــماء
!!!!!!!!!!!!
عابس وجــــون وحبيب انصار لحسين الغريب
وحك دم نحره الخضيب حسين بس هوه حبيب
نذر لتراب الحــــــرم فده يم عــون
روح ننطيهه قســــم بعد وعيــــون
يستمر هذا العطــــــاء اي وحــك رب السماء
!!!!!!!!!!!!
شمس تضوي بكل زمن حسين بس هوه وطن
انصار رغمن عالمحــــن بدمنه لْـۆ غركت سفن
حسين شمس الماطفت تضل كل حين
روح وعيون املكــــــت الك يحــــسين
حسين يا باب الرجــــاء اي وحك رب الســماء
!!!!!!!!!!!!
ارواح ننطي وما نمــل وحــــــك عباس الكفل
يضل بحســــين الامل نضــــــل ولحد الاجل
احنه لحسين الحــــزم نضــــل ويــــاه
حرس نحرسله الحرم قــــــسم نفداه
نضل ننصبله عــــــــزاء اي وحك رب السماء
!!!!!!!!!!!!!
بقلم الملا ناجي الصالحي ✏
ونسالكم الدعاء
قصيدة رقم 7
( الانصار)
لامنعوفك دونك غربه
شايف واحد يترك گلبه
لا منعوفك لا ،،،،،،،،،،،نقسملك بالله
،،،،،،،،،،،،،،،،،،،،،،،،،،،،،،
1
تدري يغار العاشگ گلبه
مايترك خله بنص غربه ،،وشلون انخليك
خلي ايموت الشافك جنه
هوه الموت شياخذ منه ،الاصلآ ميت بيك
اليتنفس من وجهك ملگه
يعني فراگك حيل ايخنگه
الهوه انت هوا ،،،،،،لا منعوفك لا
،،،،،،،،،،،،،،،،،،،،،،،،،،،،،،،،،،،،،
2
بينه انت ومانگدر ننسه
وياهو اليگدر يترك نفسه ،،،حبك موبلكيف
مثل شموع بليلك ذبنه
باݘر وانت تشوف ارگبنه ،،،نذبح بيهه السيف
تعرف يحسين انت انصارك
نبضات البينه من افكارك
عشگك ماننساه ،،،،،،لامنعوفك لا
،،،،،،،،،،،،،،،،،،،،،،،،،،،،،،،،
3
صرنه من انشوفك نلگانه
ومويحسين انكلك انه ،،،من گد مانهواك
يمك وعليك اتعانقنه
غير الله بحبك رازقنه ،،،وراح انموت وياك
باݘر كلمن طاح اتشيله
وبين احضانك تدعيله
والدم مجازا ،،،،،،،،،لا منعوفك لا
،،،،،،،،،،،،،،،،،،،،،،،،،،،،،،،،،،
4
خلينه اگبالك نتوذر
يطش عطره الهيل اليطشر،،،عطرك بينه يفوح
غير انت الماي ايصيحوله
نشرب من غيرك معقوله،،،أي ياماي الروح
واتشرب اطفالك بيمينك
زمزم يعرك ݘان اجبينك
ينگط صار اشاه ،،،،،،،لا منعوفك لا
،،،،،،،،،،،،،،،،،،،،،،،،،،،،،،،،،،،،
5
باݘر كون انصير اميه
من تݘوه عيون ارقيه ،،،انصيرلهه اعيون
كون الحسره تخضر غيمه
ونظل نمطر فوگ الخيمه ،،،من همه يحرگون
كون اعذيبي انخضر يمهه
زينب لو حرگوهه اخيمهه
والكافل ننخاه ،،،،،،،،،لامنعوفك لا
،،،،،،،،،،،،،،،،،،،،،،،،،،،،،،
الشاعر بشار السامي
قصيدة رقم 8
#نزلة
نبقى الانصار بفخر . حد ظهور المنتظر . يبواليمة
،،،،،،،،،،،،،،،،،،،،،،١
نبقى انصارك يغالي . نبقى حد يوم الحشر
مانعوفك يبو الأكبر . انته مفتاح النصر
خلنه نتگطع بحبك . فدوه الك كل العمر
صرنه نتمنه الشهادة . صرنه نسحگ عالجمر
البايعك يعني انتصر . حدظهور المنتظر . يبواليمة
،،،،،،،،،،،،،٢
مثل جون ومثل عابس . دوم ترجع كربله
من حبيب ابن مظاهر - تبقى هاي القافله
ذوله انصار العقيدة . علمونه المرجله
مانخاف من المصاعب . احنه اهل المعظله
حب الحسين استقر . حد ظهور المنتظر . يبواليمة
،،،،،،،،،،،،،،،٣
من برير اصل البطوله . بالشدايد ماخظع
وصولت الحر الرياحي . بيهه كل واحد سمع
ونافع الضحه بوريده . وللظلم لا ماركع
لحد يوم المهدي ثوره . المهدي نفرح لوطلع
اسم الحسين انتشر . حد ظهور المنتظر . يبواليمة
،،،،،،،،،،،،،،،،،،،٤
ربنه طول الزمن خله – انصار الك يبن الولي
غصبن اعله احفاد اميه . دوم نصرخ ياعلي
راية العباس عدنه . وكل مصيبة تنجلي
ابو صالح لو لزمهه . على العالم تعتلي
نسحگ دروب الخطر . حد ظهور المنتظر . يبواليمة
،،،،،،،،،،،،،،،،،،،،٥
مايهمنه الحاربونه . احنه انصار الشهم
حسين علمنه الشجاعة . وصرنه بالحومه زلم
دوم منتصرين نبقى . احنه ابد ننهزم
حسين حبه بدمنه يجري . ونشتعل غيره وعزم
نراواي للعالم صور . حد ظهور المنتظر . يبواليمة
،،،،،،،،،،،،،،،
الخادم \ حيدرموسى الرميثي
قصيدة رقم 9
#مقدمة
من مدرستكم – ينصار الحسين
نتعلم دروس – وانتم عناوين
******1***********
منكم اتعلمنه – حسين ابونه وأمنه –مانبالي بدمنه
خل يجري اعله حبه
عابس ايفهمنه – اعله الجنون وفنه – بدرسة وتجننه –
طعم الحب نشربه
وجون وضح رايه – ماتطيح الرا ية – حسين اعظم ايه
ونموت اعله دربه
من جامعتكم – اعظم قوانين
نتعلم دروس – وانتم عناوين
******2***********
من بري راياته – رتل بصولاته – بالحرب طكاته
تاريخ البطوله
من زهير القائد – العسكر اصبح شارد – للعقيدة ايجاهد
عنوان الرجوله
ونافع بحملاته – لسه تحجي ابياته – مانسو ضرباته –
نافع فعله كوله
بينه تعيشون – كل لحظة باقين
نتعلم دروس – وانتم عناوين
******3**********
وهب لا ماقصر من وفه بالمنحر – من تحدة العسكر-
ماننساهه امه
ضحت وماخافت – وي ابنهه وثارت – للشهادة اختارت
والباطل تهزمة
بيهم اتباهينة – بالشدد ضحينه- الدنيا تشهد لينه-
شجم شاب النقدمة
فن الشهادة – ودرس المضحين
نتعلم دروس – وانتم عناوين
******4***********
من حبيب الباسل – درس منه انقاتل – مانذل للباطل
نتحده الشدايد
وانس ضل قرآنه – ينقره بميدانه – اتحيرت عدوانه-
صنديد ومجاهد
شيعه وتربينه – بحبهم تغذينه – ياهو يندك بينة –
نحميهه المراقد
يرخص دمانة – فدوة احنا للدين
نتعلم دروس – وانتم عناوين
******5***********
والحر بحريتة – بتوبته وتضحيتة – من كتب بوصيته –
فايز كل حسيني
والحر اشرف قائد – تاب لله الواحد – للعقيدة يجاهد –
يصرخ من يجيني
درس بالحرية – وثورة حسينية – الواحد احنه ابمية
انصيح الحر يقيني
عابس قبلنه – احنه المجانين
نتعلم دروس – وانتم عناوين
*****6**********
مانعوف الغالي – حسين يبقى العالي – بكل شمر مانبالي
خل يسمع خصمنه
بدربه لو نتوذر – هذا درس المنحر – للخطر نتحظر
ونتعب عدونه
ودوم نرفع راية – بيهه نكتب ايه – والحسين الغاية –
ونحبه ويحبنه
من طين الانصار – صرنه الموالين
نتعلم دروس – وانتم عناوين
******.*****************الخادم - حيدرالرميثي
قصيدة رقم 10
ذوله عراكه اسباع زين وتلمهم كاع
----------------
عزل الموت وصفن
أسيوفهـم نـار ودون
روس يردن ما طفن
جابو الحك ما ضاع ذوله عراكه اسباع
---------------
صاح عابس يا جون
هـوس وهـز الكـون
كـلـه خـادم ممنـون
كام دك هوسه أبساع ذوله عراكه اسباع
---------------
كامو الـحـر وزهـيـر
روس لو زمخو تطير
الــزلـم تـشـرد تـحـير
زلم ما لمهه اوساع ذوله عراكه اسباع
---------------
طبكـو الحـومه طبـك
للعـرك عـدهـم خـلـك
الجيش مل جابوه طرك
اطباعهم خوش اطباع ذوله عراكه اسباع
--------------
بالركب تغرف غرف
سيوفهم تكرف كرف
الزلم صارالها كطف
بالعرك والله ابداع ذوله عراكه اسباع
----------------
لخادم الانصار
مـحـمود الـعـكيلي
قصيدة رقم 11
جديد محرم الحرام ١٤٤٠هـ
🚩🚩🚩🚩🚩🚩🚩🚩🚩🚩🚩
نزله بحق الانصار عليهم السلام
يا عميد انصارنه~~ گوم وخذ بثارنه
ياحبيب •••• ياحبيب
@@@@@@@@@@@
ياحبيب انتفض شيل الرايه
ياعجيد الگوم بيك أكفايه
انت يالدمك نذر للثايه
ذوله انصارك اجت عنايه
...................................
هذا عابس وي برير ~~ سيوفهم تذبح الطير
يا حبيب ••••• ياحبيب
@@@@@@@@@@@
بالمعسكر ضجه صارت وغبره
انتخه العباس سبع الگنطره
وين اخوتي ليوث ضنوة حيدره
گالت الانصار نبدي مناوره
..........................
ننزل اول بالقتال ~~ مانهاب احنه النزال
يا حبيب ••••• يا حبيب
@@@@@@@@@@
دگو الظهر بظهر جون وهلال
ويا حلات ارسومهم طبو نزال
جيش اميه گبالهم أصبح خيال
نذر هاي ارواحنا لاشرف عيال
.............................
انموت دونك ياحسين~~ نحقق النصر المبين
يا حبيب ~~ ياحبيب
@@@@@@@@@@
( عبد الرحمن بن عبدالله اليزني )
هذا ابن عبدالله ابن آل اليزن
نصر دين حسين وياه الحسن
جننه حسين انطلق من اليمن
يشترك بالواقعه يفوز بعدن
..............................
روحه دون الطيبين ~~~ حده وي گطع الوتين
ياحبيب ~~ ياحبيب
@@@@@@@@@@@@@@@
صوت ابن مسروق أذن للحرب
بسيفه أبن القين يگلبها گلب
يحلف بحيدر يسويهم حطب
حسين خطنا وما نزل هذا الدرب
.............................
كسرو اغماد السيوف~~ما يهابون الألوف
ياحبيب ~~~~ ياحبيب
@@@@@@@@@@@@@
اجه (الحر ) يم الحسين ومرتعد
گـلـه يا مـولاي حـاضر مـستعد
اليوم اوفي الدين ماهاب العدد
نرفع احنا سيوفنا وتنزل رعد
..............................
جيشهم ماله قرار ~~ نعلن بطف الحصار
ياحبيب ~~ ياحبيب
@@@@@@@@@@@
شتد وطيس الگوم والحومه حمت
خيولهم وي المنايه تشابكت
دمومهم وي الحسين تخالطت
صعدت الأرواح حور وعانقت
..............................
كشخوا ولبسو چفن ~~ فازو بجنة عدن
ياحبيب ~~ ياحبيب
@@@@@@@@@@@@
#الخادم_غازي_الساعدي
قصيدة رقم 12
حياهم حياهم هالانصار
......................
طبوا هيبة الديره – ترسوها الحرب غيره – خلو بالزلم حيره
ثكيله اعلامهم
حبيب وصاحهم يمه – اخوتي كلهم الهمه – اريدن ما يظل زلمه
اذبحوا ازلامهم
0000000000000000
جون ايأشر العابس – منك ما يمر فارس – جنك عد علي دارس
كضيت ارجالهم
سيفك عالذبح يهوه –يمشي اعله الركب كوه – تارس كصتك نخوه
لويت اسباعهم
00000000000000000
حر الحومه يرهبها – يشد عالشكره يتعبها – جراها بشواربها
نـــزل لكبارهم
زمهر واشتعل كله – يمر عالعسكر ايشله – عزرايل اخذ مهله
يلم برواحهــم
000000000000000000
طشوا ترسوا الحومه – ردوا جعفر ويومه – ذب العلكمي اهدومه
تحير شافهم
موت بساعة الملكه – من عدهم فلا تلكه – يمنهم واصله الزركه
ثكيله اخبـــارهم
ــــــــــــــــــــــــــــــــــــــــــــــــــــــــــــــــــــــــــــــــــ
كلمات: محمود العكيلي
قصيدة رقم 13
عندما ذهبت زينب للحسين ع
وعندما اذهب انا للحسين ع
زاير اجيت لحضرتك وامشي ابرهاتي
ماجيتك اركض والجمر يدوي ابعباتي
ما شارد امن النيران
ولا مختنك بالدخان زاير اجيتك
*******ا
بال صافي وكلب هايم من اجيتك زاير
موش مچوي ابجمر خيمه وشارد امن الحافر
حالي مو مأساوي حته واكسر اني الخاطر
مثل كل يوم امن ازورك مو بيوم العاشر
ماجيتك اعثر بالجدم وامشي اعله طولي
ولا يمي اطفال ابحزنهم يشتكولي
ما راكض اويه النسوان
ولا مختنك بالدخان
******ا
ما عشت حال العقيله ولا عشت الامك
ما اجيت الجسمك اركض وانضرب كدامك
ما سمعت اصياح سكنه ولا صياح ايتامك
ولا شفت خيل ال اميه ادوس فوك اعظامك
ما شفتك ابذاك الوضع يبن الزجيه
تلعب عله صدرك سحك خيل اعوجيه
ما صاير ابأي انسان
ولا مختنك بالدخان
******ا
من ازورك ياحبيبي دوم يكثر خوفي
ومن اكض شباج كبرك كوه اطلع احروفي
ما اجيت ابرجلي جمره والحبل بجفوفي
ولا شبع دخان وجهي وصار احمر شوفي
ما تيهت اني الدرب لمن اجيتك
ولا چلچل الليل بغرب واستاحشيتك
ما منسئل عل الخوان
ولا مختنك بالدخان
*******ا
انحرج مولاي يمك واستحي امن الفشله
جنت يم عباس ازورن ما جنت عل التله
اني اجيت ابطلب حاجه ما اجيت ابعله
ما اجيتك حته اكلك باجر اركب هزله
جيت محب يا سيدي اشتاگ لحبيبه
ماجيت اكلك راح اظل بعدك غريبه
ما نايم ابلا صيوان
ولا مختنك بالدخان
*******ا
كل زياراتي حبيبي مثل اليزورونك
ماشفت بعيوني اني ابخنجر ايذبحونك
ولا شفت دم ابجبينك نزل فوك اعيونك
ولا گلتلك خويه كوم ولحگ اعله اضعونك
سامحني عن كل الحجي هذا الحجيته
يرسملي كبرك واقعه كلما اجيته
المفروض اجيلك عطشان
لو مختنك بالدخان
*******ا
الشاعر
مصطفى البديري
قصيدة رقم 14
خل يطمئن گلب العقيله
سبعين أبد لا مو قليـــله
أنصارك إحنه ونفتخر بيك
غيرك فلا عدنه وسيـــله
…………………………………………………………………………………………
من المدينه الكربله
خطينه وياك العهد
يحسين أنصارك نظل
لا ما نعوفك للأبد
بالدم نعاهد يالسبط
الله على الموقف شهد
ميهمنه ميدان الحرب
يبن الولي وإنته المدد
نسحگ على درب المنايه
بيد الگمر مرفوعه رايه
نرفع شعار بيوم عاشور
غيرك فلا عدنه وسيـــله
…………………………………………………………………………………………
حقهه وتنشدك يالشهم
مولاتنا بنت الولي
يحسين دگّلهه الصدر
گللهه يختي اتدللي
آني حبيب وهالزلم
بيهه المصاعب تنجلي
إنشد الحزم بالمعركه
لمن نــنــادي يا علـــي
من نندب بإسم الصميده
كل الجره بخيبر نعيده
يا سيدي زامط بالانصار
غيرك فلا عدنه وسيـــله
…………………………………………………………………………………………
شيخ الآنصار إتشرفت
يا سيدي بهذا اللقب
بعمري المضه والي يجي
عد عينك يهون التعب
خادم العتره الطاهره
ما يوم أردّلكم طلب
هنيالي أحظه بهالشرف
يحسين والفطره السبب
سجّلت بسمك كل حياتي
من مولدي الساعة مماتي
كل الانصار بهذا الاحساس
غيرك فلا عدنه وسيـــله
…………………………………………………………………………………………
جون وزهير وخادمك
ونافع وخوّان الگمر
عائذ وسوّار ووهب
ونخبة بني هاشم فخر
كلمن سمع أمرك وجه
طلّگهه دنـــيــاه وحضر
موعدنه بالطف عاشرك
موقف شرف هذا صدر
هيهات منّا الذله هيهات
إي والرفع سبع السموات
ما عدنه أغلى امن الشهاده
غيرك فلا عدنه وسيـــله
…………………………………………………………………………………………
يا جيش أُميّه ويا عطش
يرهبنا يا والي النعم
باچر بميدان الوغى
عباس لو رف بالعلم
ننزل اليوث الحومتك
والليث ميهاب الغنم
ياغالي واغله امن النفس
خط أحمر حدود الخيم
والزينبك أمّن خيمهه
هالمعركه إحنه زلمهه
منك يبو الأكبر عزمنه
غيرك فلا عدنه وسيـــله
…………………………………………………………………………………………
باچر نصفّن كربله
وليل العطش نطلعله ضي
مو إحنه نضعف بالظمه
يالشوفتك تروينه مي
لو كلهه ضدنه اتحالفت
جور وضماير كلهه غي
لو كلنا نحيا بثورتك
لو موته وحده وإنته حي
دنيانه ما تسوه بدونك
أنصارك وگرة اعيونك
عونك يروح الهادي وياك
غيرك فلا عدنه وسيـــله
…………………………………………………………………………………………
اشيسوه العمر يا سيدي
من غيرك وانته النبض
وأرواحنه فدوه الك
يالعاشرك سادس فرض
الأمر أمرك بالطبع
عد عينك وما نعترض
واشيكتب الباري بعد
سمعاً وطاعه ننتفض
لا ما نساوم ما نسامح
دين الله يبقه ويبقه راجح
برّد گلب زينب والعيال
غيرك فلا عدنه وسيـــله
…………………………………………………………………………………………
خادم الإمام الحسين عليه السلام
عمار هليل الواسطي
قصيدة رقم 15
قصيدة أساس ليلة 6 محرم
دنيا ومابيها حسين عكبك ماردناها
خلينه أنعيش أحرار وبحــبك نتباها
احنا أنصارك احنا أنصارك
1
دنيا وعكبك مو حلوه
يامصباح العاشــــــــــك يالحبك سابينه
نهوه وغيرك مانهوه
سمعانين بحبـــــــــــــك واليوم انجنينه
صدكنا اليعشك بلوه
واحنا أنحسك شهكه وكل لحظه أتمر بينه
تاج ونبراس وقدوه
أمرك طعناه وأعله الهامـــــــــــات امخلينه
أمرك واجب مفروض واحنا اليوم أنطيعه
ياباب الله المفتوح يـــانوماس الشيعــــــه
احنا أنصارك احنا أنصارك
2
فدوه أنروح لطاري أسمك
ياحوض الكوثر ياشمس الله يا غالي
ياحسين وطاهر دمـــــــــك
قمه أعله العالم تبقى أنت وسورك عالي
هليله بدمنا أنخــــــــــدمك
ونضحي أنحور لخاطر ديــنك يل والي
أنصارك والكل يمك
وأنت الأول يوم المحشر وأنت التالي
أنت العلمت الناس درب الحك تندلــــه
صحنا بحبك هيهات مانرضه أبكل ذله
احنا انصارك احنا انصارك
3
صفينه وشلنه الرايه
هاي أخر ساعه وشخصك يجمعنا آوياها
معروفه آوياك الغايه
والموته بدربك يابو اليمه اشمحـــــــلاها
احجايه اتجيب احجايه
جلمه أكبال العالم والضــــــــــــدت كلناها
شيعه ولجلك وفايه
بيها أعله ابن ازياد بوادي الطـــف نتباها
يل تسمع هذا الصوت انظل شيعة حيدر
مانتفاهم بالسيــــف أحذر من عدنا أحذر
احنا أنصارك احنا أنصارك
4
لو لاك الدنيا مروحه
ولا ظلت للديـــــــــــن العامر كل قدسيه
وفجرك جا ماطل صبحه
لو بالطف صافحنا الدوله الإجراميــــــه
شخصك مفروض أنمدحه
لو ماشخصك جا معدومــــــــه الإنسانيه
وكل العالم مايصحــــــــــه
لو ما دمك ينزف وتصيـــــــــــح الحريه
أنت بدمك وفيت واحنا أوفينه الـــــــدمك
عل مذبح واحنا أنصيح فدوه أنروح لأسمك
احنا انصارك احنا انصارك
5
عابس شد روحه بسيفه
وعبد الرحمن وعبد الله وقيس وعمران
كل واحد ظل ابكيفه
واكف صنديد بزوده ويتحـــــدى العدوان
صاح الما يأخذ حيفه
خل ايطم روحه ولا يوكف وي الشجعان
ولا حجي السانه ايضيفه
وخل يعرف معنى الجلمه وقيمة كل إنسان
الي اتكول احنا أبطـــــال بالعسكر نتلاكه
بس خل أيظن بالسيف تجدح نار أشواكه
احنا انصارك احنا انصارك
6
عنك أبدا مانبعـــــــــــــد
أنموت بحبك نتمـــــنى ونتسمى أحرار
نرضى بدربك نستشهد
ويسجلنا بدفتر حبــــــــك شيخ الأنصار
بسمك ظلينه أنردد
أول ما ذبحونه كالـــــــــو شني هل إيثار
ومن شافونه انحب بجد
ذبحونه وشافوا بالدم موجـــــــوده الآثار
ونذهلت هل عدوان شافوا حبك بالدم
خل يسمعنا الذبــــــاح ماذابحنا أتوهم
احنا انصارك احنا انصارك
شطرة
امجد صاحب الشطري
قصيدة رقم 16
ئ علي الخفاجي
للحــرايب سـبعـيـن أنـصـارك أجـيـنه
من يطلع المصباح نــرخـصلك الأرواح
أنصارك أجينه
*
فـجــر الــحــرب يحــسيـن مـن تنخانه
يــم الـخــيــم تـوگــف رخـيصه أدمانه
أنـصـارك ومــــا نـهــتـــــم الــــدنيانه
وصوت الشرف بأسمك يصيح ألسانه
ما تــردنه الأخطار لـلـمــوت أعـتـنـيـنه
ودم مناحرنه ســلاح نــرخصلك الأرواح
أنصارك أجينه
*
كل عاشگ ويــاكم يضحــي بدمه
وبـأرض الطفوف ينادي يابواليمه
من أنصارك السبعين هـاي الهمه
بالعاشـــر أنطـيـناك أشـرف كلمه
مـا نعـوفك هيهات وأبــدربك مشينه
وأبـدافــع الأصلاح نرخصلك الأرواح
أنصارك أجينه
*
دم الـمــنــاحــر يـبـوالـيمه تشوفه
لــلـمصـرع أرواح الزلـم ملهوفه
ضاع الوفــه ويمك نخط أحروفه
أسمك الكعـبه وبالسيوف أنطوفه
موقفك لـلــتاريخ بــأنــواره أهتدينه
للزمن صوتك صاح نـــرخصلك الأرواح
أنصارك أجينه
حبك ثبت بدمـانـه يـبـن الـزهـره
لا مــا يخـيب اليـفـتـديك بعـمـره
باچــر يفجــر دمـنـه أعـظم ثوره
ونـتـوســـد بگاع الطفوف الحره
ثــورتنه لــلأيــام نكتبها بـوعينه
وحفظ العهد ماراح نرخصلك الأرواح
أنصارك أجينه
*
وي السيوف بكربله تلاگينه
وهـيهات عنك سيدي تخلينه
بـدم الـشهاده وياكم توضينه
مهما يـمــرحبك تـولــد بينه
وبساحــة المـيــدان نهتف مـــا وفينه
ويشهد الدم الساح نرخصلك الأرواح
أنصارك أجينه
دربك يظـل طــول الـعـمـــر غـايتنه
أنــصـــارك وكـلــمـة شـرف كلمتنه
يـهـتــف حـبـيــب الـمـلـتــزم كلمتنه
صيحة ضمايــر بالحرب صيحتنه
صوت الشرف قرأن وبالذل ما رضينه
والوفه يصير وشاح نرخصلك الأرواح
أنصارك أجينه
***
تمت
قصيدة رقم 17
انصارك انصارك يحسين يا مولانه
انصارك انصارك يوم الشدد تلكانه
تامرنه يبن الزهره تامرنه يبن الزهره
____
عقيده يحسين وغلاتك نفدي الارواح
عقيده ليضل بالك وخليك مرتاح
عقيده نفزع يابو الأكبر كبل الاصياح
عقيده عدنه وما تهزنه حتى الارياح
تعرفنه تعرفنه يوم الشدد عد عينك
تعرفنه تعرفنه تامرنه واحنه انعينك
تامرنه يبن الزهره تامرنه يبن الزهره
يغالي بالحومه ابد يحسين لتحير
يغالي احنه اوياك حبنه ماله تفسير
يغالي معروف اليموت اوياك شيصير
يغالي ننطيك النحور وكلنه تقصير
بالحومه بالحومه يحسين تعرف بينه
بالحومه بالحومه نفديك يابو اسكينه
تامرنه يبن الزهره تامرنه يبن الزهره
عهدنه ثابت يا حسين وانته تامر
عهدنه بالدم يابو الأكبر ظهر باجر
عهدنه بالدم نكتبه ودمع النواضر
عهدنه احنه عابس وابن مظاهر
بدمانه بدمانه خطينه كل احروفك
بدمانه بدمانه يحسين لا منعوفك
تامرنه يبن الزهره تامرنه يبن الزهره
__
قسمنه يحسين وقسم بسم العقيله
قسمنه احنه انصارك وانته الوسيله
قسمنه انته البالكلب ماكو بديله
قسمنه زلمك بالوغى كلش ثكيله
ياغالي ياغالي كدامك احنه ارجالك
ياغالي ياغالي بالروح نحمي اعيالك
تامرنه يبن الزهره تامرنه يبن الزهره
فخرنه ترخصلك دمانه وكل الانحور
فخرنه قائدنه تضل يا سورة النور
فخرنه لترابك نذر هل عمر منذور
فخرنه احنه انصارك وكل يوم عاشور
والغايه والغايه مولاي ترضى اعلينه
والغايه والغايه عهد الوفه امسجلينه
تامرنه يبن الزهره تامرنه يبن الزهره
تمت بحمد الله واهل البيت ع
الخادم:ناجي ابو كيان الصالحي ونسالكم الدعاء
قصيدة رقم 18
▪32▪ سبعينك احنه وبالحشد تلكانه - اوراية أبوالغيره ترف بسمانه
ماترمش اجفون -- كل معضله اتهون - اوراية أبوالغيره ترف بسمانه
. . - - - - - - - - - - - - - - - - - - - - - - - - - - - - - - - - - - - - - - - - -
1 ) انصارك احنه اوبالحرب - مثل العصف يوم النهب -
اوجلمة عهد منطينك
ياشمعة الزهره اوعلي --- الحارب قضيتك يبتلي -
او نقسم فلا ناسينك
علمنه عابس عالعشك --'- او عنك قسم مانفترك -
او ننذر اجينه الدينك
عالساتر انهلهل فشك --- او هنياله للجنه السبك -
وبروحه ضحه العينك
☆ عنه السواتر تبجي من ضحينه - وشما ملكنه ابهالزمان انطينه
وبجفنه يدرون - كل معضله اتهون - اوراية ابو الغيره ترف بسمانه
-- - - - - - - - - - - - - - - - - - - - - - - - - - - - - - - - - - - - - - - - - -
2 ) نخنك على اعدانه الهوه - ونموت ابعينه الضوه -
بالحومه يابو اسكينه
يوم النزل جف الغضب - جم واحد ابواحد هرب -
واتجتفت جفينه
تدرينه جف المرجله --- واحنه زلم هالمرحله -
اوياويله اليلاكينه
طفك زرع بينه الوفه --- اوهبينه مثل العاصفه -
اوطف كربله امربينه
☆ والله اليضدك خل يموت ابعاره -- والغيره تفزع من تدك الغاره
صرنالك اعيون - اوكل معضله اتهون - اوراية ابو الغيره ترف بسمانه
-- - - - - - - - - - - - - - - - - - - - - - - - - - - - - - - - - - - - - - - - - - 3 ) نزرع على ادروبك ورد ----- ونرويهه من دم الحشد -
ونرفع بدينه الرايه
الطاير نجيبه أمن السمه --''--- ونجتفه يابن فاطمه -
ونحقق احنه الغايه
ابدربك جرح يشبك جرح - اوبالحومه جن فجرالصبح -
اودكينه بالحد ثايه
وفايه احنه أمن الأزل -------- جم واحد ابواحد رحل -
من موكب الوفايه
☆ هذا الوطن ضحه ابأعز شبانه -- واعله السواتر ندري ماتنسانه
وبهاي المتون - كل معضله اتهون - اوراية أبو الغيره ترف بسمانه
-- - - - - - - - - - - - - - - - - - - - - - - - - - - - - - - - - - - - - - - - - -
4 ) ناخذ عزم من كربله -- اوكلمن يضدنه انزلزله -
بالحومه يبن الزهره
أنصارك احنه ابهالزمن -- اوكلمن يمر ابهالوطن -
ابجف الكفيل انسطره
بس الوجوه اتغيرت ----- اومولانه ضدنه اتجندت -
زمرة يزيد القذره
شما هجمت ابعده اوعدد - بالحومه نوكفلك عهد -
اوكلمن يفوت انشطره
☆ صولتنه وحده أو ويله اليلاكينه - او بالحومه صدك محد ايلاوينه
وبدمنه يدرون - كل معضله اتهون - اوراية أبو الغيره ترف بسمانه
- - - - - - - - - - - - - - - - - - - - - - - - - - - - - - - - - - - - - - - - - -
5 ) اربات السواتر سيدي - نكطع اجفوف اليعتدي -
اومن عنده نأخذ ثارك
جلمتنه وحده اوما نرد - ميهمنه حر اولا برد -
الحد المنيه انصارك
ابن العراق امن استعد -- ياداعش ايمرك بعد -
ايموت اليمر ابدارك
ساتر نصير المرقدك - اوكل ظنه داعش وحدك -
مايدري الله اختارك
☆ أنصارك احنه اوبالحرب وفايه - ونقسملك ابدمنه نعلي الرايه
ونزلزل الكون - اوكل معضله اتهون - اوراية أبوالغيره ترف بسمانه
-- - - - - - - - - - - - - - - - - - - - - - - - - - - - - - - - - - - - - - - - - -
لخادم أهل البيت - أبو أحمد المجراوي - 07805007942
قصيده بحق الانصار
قصيدة رقم 19
قصيدة ليلة الانصار
بنصارك اضرب مثل .. واحدنه چنه الجبل
لـتبــالــي لـتبــالــي
يــرخـصلك الــغالي
بنصارك اضـرب مثل
--------------------------
اعلينه نصــرتك ســـيدي مفصله تفصال
وماخاب ضنــك يالــذي سميـــتنه اجبال
احچايه وضروري سيدي كل وكت تنگال
الـماعــنده غيره عليك مايتـــــسمه رجال
انت التسمي رجل .. ايسمونه گول وفعل
اي والله يالوالي
يرخصلك الغالي
بنصارك اضرب مثل
--------------------------
هالحـومه اذا انـته تـشم من عدهه عطاب
معـناهه نار اتــوجـرت بگلـوب الاصــحاب
قد قامــت الساعه تـره وقـد قام الحساب
امن اتراب اصـــلهم سيدي ونـردهم اتراب
اشر تشوف العجب .. انسوي الدمه للركب
حچـايتنه للتالي
يرخصلك الغالي
بنصارك اضرب مثل
--------------------------
بكل خطوه الك يابو علـي وبكل شبر عون
للـــــموت اخـذنه براحـتك لا تـسال اشلون
صح جيشهم سبعين الف ولو يترس الكون
كافـــي عليـهم سيدي بـس عابـس وجــون
بنظرة الجمع اججه .. مسلم ابن عوسجه
ميدانـهم خالـي
يرخصلك الغالي
بانصارك اضرب مثل
--------------------------
لجـــلك يغــالي بالـحـرب طـشينه الارواح
لا ينشــــــغل بالـك ابـد خلــــــــيك مرتاح
السبعين الف راس وعلي بحيل الله تنلاح
الجيش ال اميه من العرگــ منخلي سباح
برايه حبيبي الترف .. كل خفگه تكتل الف
لحساب الاجمالي
يرخصلثك الـغالي
بنصارك اضرب مثل
--------------------------
عــزريــل باچــر سـيدي يفــتر عــالصفوف
وجوه الزلم هالصـوفرت وعيـونك اتشوف
تشهد اذا صار الصـبح نخــلات ألاطــفوف
تخرس زلم توگع زلـم من تحچي السيوف
الراس الذي ينگطع .. يشهد عليه كل جذع
وهالفعل متوالي
يرخصـلك الغالي
بنصارك اضرب مثل
--------------------------
هيه الــشجاعه بالـزلم من الله اطـــــباع
شماتعصي في سوح الحرب ثق تنهي بساع
عــندك زلــم لـو زمجــرت تتمـــايل الـــگاع
آمــن يبــو اليــمه الرجــال العــندك اســباع
شاهد وجه كربله .. تعرف شنو المساله
بهالوضع الحالي
يرخصلك الغالي
بنصارك اضرب مثل
&&&&&&&&&&&&&
لخادمكم حيدر تركي الكربلائي
قصيدة رقم 20
نزلة ليلة الانصار
لحسين لحسين ارواح نــفديها
والماتــصير ابكـربله انـســويها
----------------------------
الماتجي بــيدينه .. انجـــــيبهه بالگوه
كـربــله موصيتنه .. بـهاي مــاكو مروه
شعره من شعراتنه .. مـا يهز هالمجمع
تره اقل مـن صوله .. الزلمه بيهم يركع
باچــر ايشـــوفونه .. لــو بـده ملـگاهم
نــينوى اوديــانـهــا .. ماتلــم مـوتـاهم
نشعلهه احنه واحنه النطفيها
والماتــصير ابكـربله نـسـويها
----------------------------
الرايدين ارواحهم .. كربله ايــعوفونها
روسهم بجسامهم .. تــره مــايــلگونها
كربله العطشانه .. تغرگ امن ادمومهم
ينــدم الــوداهـم .. والـيـدور اعـلومهم
مـحــد اينجيـــهم .. والحكــم بـــيدينه
لــو تجـي مـشايه .. الدنــيه مــترضينه
نفنيـها احنه ونگـدر انخليها
والماتــصير ابكـربله نسويها
----------------------------
نزلـــو هاماتهـــم .. هــمه ويـنه اوينه
الگـال انه الــقائد .. فــنه يــرفع عينه
جيشهـم يتراجـف .. من جميع اكتاره
الخوف لاعب بيهم .. هـاي گبل الغاره
شـلون لو هــديـنه .. وابو اليمه الــقائد
والله من اجيوشهم .. فنه يصمد واحد
والموت الاحمر باچر انراويها
والماتـــصير ابكـربله نسويها
----------------------------
اتضاربت ارائـهـم .. هذه كله انشوفه
الاكـثــريـه گــالــو .. ننســحب للكوفه
مانريد ارواحـنه .. امگابليـــن احيوده
اعمارنه مريوده .. الشرده هم مريوده
مدد ماجابــلهم .. الشمر مـن رد وحده
بيــنت بعيونهم .. هـمه طــاري الشرده
نخبطت زلمهه واحنه النصفيها
والماتـــصير بكــربـله انســويها
----------------------------
البالجـمع يتبــختر .. شــويه خل يتهده
گــبل مادم نــحــره .. عـــالارض يتـبده
واليمـــس احـسيـنه .. حــته لو بحچايه
خــل يحـَضر گــبــره .. جايتـــه الـوفايه
وحته لو ضـــم راسه .. احنــه هـم نندله
والحچه خل يصمد .. في مكانه احسنله
هالكلمه يتحملهه من يحچيها
والماتــصير ابـكربله انســويها
----------------------------
حسـين المربيــنه .. ونـفخــر ابـــتربيته
والــذي يـتــــماده .. ناقـصه شخــصيته
الثقه عنده بنفسه .. ماتــهــزه امـــثالهم
وجيشهم ميهزنه .. ولا تهـــزنه ارجـالهم
الحومه والمابيــهه .. ماتـــخوف اگلوبنه
امن الارض نمحيهه .. من اجل محبوبنه
سبعين الفهم مانفـكر بيها
والماتـصير بكربله نسويها
&&&&&&&&%%&&&&&
لخادمكم حيدر تركي الكربلائي
قصيدة رقم 21
قصيدة نزلة
كلمةْ شرف للموت ويّاك
…………………………………………………………………………………
بصوت الضماير محلى هالصوت
للموت كلنا أنصار للموت
باچر تصير الحومه تابوت
ومثل الأضاحي تشوفهه إعداك
…………………………………………………………………………………
عد عينك ورهن الإشارة
بالدم نخط عهد الغيارى
محّد يقدّم إعتذاره
أنصارك إحنه وسيف يمناك
…………………………………………………………………………………
إحساس حبك أحلى إحساس
يحسين وانته رفعة الراس
باچر يشيل الرايه عباس
بالحومه باچر نثبت اهناك
…………………………………………………………………………………
سبعين ألف خصمك لتهتم
عالسيف باچر يرجح الدم
يا هوّه يوصل للمخيّم
سور المخيّم كلنه نفداك
…………………………………………………………………………………
فدوه العمر يا بهجت العين
وابخدمتك مولانا يحسين
باچر نحول إبْينك وبين
شر الأعادي ونرتجي إرضاك
…………………………………………………………………………………
قائدنا ها وإحنه العساكر
بكلمة شرف تدوي الحناجر
شاهِدنا بالميدان باچر
يالغالي شنهو العمر لولاك
…………………………………………………………………………………
ما عفنه دربك يا بو الاكبر
أنصارك وخدّام نحضر
وبكربلاء اليوث بالبر
لمن يرفرف سيدي الواك
…………………………………………………………………………………
خادم الإمام الحسين عليه السلام
عمار هليل الواسطي
قصيدة رقم 22
مقدمة ليلة الانصار
لا مـــانــركــع .. ياموت اسمع
انصار حسين ايسمونه
----------------------
عانقـت رايــاتــنه چـــبد الســــماء
واحنه مـن عــدهه اخذنه الكبرياء
اذنـت بچفـوفنـه اسيـوفنه الـولاء
وفــزعت اويانـــه تــــقاتل كـربلاء
لازم تــقـــنــع .. ياموت اسمع
انصار حسين ايسمونه
----------------------
عين هـمه واحــنه حاجب للحـسين
وعلى الحاجب ابـد لا مـاتعـله عـين
الـراد يوصــلنــه تگــله اتــريــد وين
السالفـه اعـليه نختــصرهه بكلمـتين
ثـق مانخـضع .. ياموت اسمع
انصار حسين ايسمونه
----------------------
لمن گالو عابـس وجـــون وحــبيب
الموت مر بس وي ابو اليمه يطيب
وينـه فــنه اليــدنه لخــيـام الغريب
گــبر يحـفـرله وچــفن وياه يجــيب
يالمــاتـــنفع .. ياموت اسمع
انصار حسين ايسمونه
----------------------
بالشـجـاعه البيــنه مـضروب المثال
ما نــدنـگ روســـنه بيــوم الــــنزال
الحومه ماشاهــدت مگـفانـه محال
إي يمـوت ودومــنـه انگـــلك تــعال
للحـق نفزع .. ياموت اسمع
انصار حسين ايسمونه
----------------------
جيوش اميه ماتــهمـنه اشما تزيد
صايمين وعـدنه يـوم الملــگه عيد
ولــذالك هـمه ميــــصمدون اكــيد
خاف يـوم النــــهروان احـنه نعيد
خافو يرجع .. ياموت اسمع
انصار حسين ايسمونه
----------------------
حسين لمن گال حي اعله السيوف
چنهه نزلت صاعقه فـوگ الصفوف
والطفوف تخلبصـت كلهه الطفوف
حيره مدري اشـصاير ابهاي الالوف
اشبيه هالمجمع .. ياموت اسمع
انصار حسين ايسمونه
&&&&&&&&&&&&&&
لخادمكم حيدر تركي الكربلائي
قصيدة رقم 23
أنصارك نظل للموت ونضحي ألك بدمانه
ليوم الحشر نبقى وياك يحسين وأنته ويانه
*************************
هاي الأماني عدنه من چنه زغار
بالطف الك يبن النبي نصير أنصار
نحسد الأشتر وي ابوك وعمار
ألمن وهبنه الباري هاي الأعمار
ألمن مناحر يحسين ربنه الجليل أنطانه
************************
جبناهه نتنطر يبو اليمة سنين
للطف نجي يمته ونصير ويحسين
ينطيك باچر كّمر هاشم جفين
ألمن نضم ارواحنه وشمتانين
كَبل أهل بيتك يحسين فوكَ الترب تلكَانة
************************
بيوم القيامة شنحچي لمّك شنكَول
يحسين فشله وكل عذر ما مقبول
أله نهد عليها باجر ونصول
تسحكَنة كون الخيل يمك وتجول
شنحاجي حماي الجار لو سلبو نسوانة
***************************
باچر علي الأكبر يضحي بعمرة
وتشوف جاسم من يكَع عالغبرة
حتى الطفل ينطيك باچر نحرة
من ينقبل منعدنه باچر عذرة
لمن ترض جسمة الخيل من يوكَع بميدانة
***********************
انريد يمك روسنه يرفعوها
من زينب أختك باليسر يسبوها
نسوانهَ ويـــاكم يسلبــوها
مو بس رقية بنيتك يضربوها
عالهزل وياهه تروح وعلينه هم حزنانة
***********************
وياك نتخلد نريد بكل عام
نصنعلك بهالتضحية شلون ازلام
متخاف باچر عفلق ولا صدام
يحمون زينب لو نختهم بالشام
شيعتكم تروح هناك وبيهم تظل فرحانه
************************
تهاب المراجع بالنجف غايتنه
بيد الحشد من ترتفــع رايتنه
كل طاغي يحكم نرفض يشتتنه
وياك ردنه لهالسبب موتتنه
هذا الحشد تاج الراس عرض الحراير صانة
************************
حيدر حسين الكرعاوي
قصيدة رقم 24
الثار الثار/أحنه الأنصار
منعوفك يحسين / منعوفك يحسين
★★★★★★★★★★★★
أنصارك يحسين وأحنه / نفديك أبدمنه
يرخص كلشي لجل عيونك/والله وميهمنه
هذا اليوم البي نرضي الله/ أوالدنه وأمنه
دربك يابو الأكبر هوه / بل جنه إيلمنه
خطينه حروف / دربك منعوف
منعوفك يحسين/منعوفك يحسين
★★★★
شلون أنعوفك وأحنه أنصارك/ياروح الزهره
هوه الي يعوفك شيسوي / يحسين بعمره
هايه الفرصه منضيعها / ويومك ننتظره
حتى يقدم تحت أجدامك / كل غالي نحره
عابس وي جون / اليوم إينادون
منعوفك يحسين / منعوفك يحسين
★★★★
قيس وعابس جون ونافع/والحر إينادي
أرخصلي واحدهم يصرخ /ياروح الهادي
خل أنزل للحومه رايد / تحقيق أمجادي
بين أچفوفك حتى أستشهد/وآخذ أمرادي
نادينه بصوت /خلينه نموت
منعوفك يحسين / منعوفك يحسين
★★★★
لن شيخ الأنصار إينادي/ويحشم الأنصار
يحسين وجدك منعوفك/ مابين الأشرار
نختارك من بين الوادم/ ماغيرك نختار
لو عفناك أحنه بيا صوره /نواجه المختار
باچر شنگول / الطه الرسول
منعوفك يحسين / منعوفك يحسين
★★★★
خل زينب ترتاح وگلها /أنصاري السبعين
للموت وياك أحنه وحاشه/نتركك يحسين
محد يگرب يم خيمتها /وأحنه موجودين
وشحده اليگدر يسبيها /وتدخل أدواوين
لآخر أنفاس / والگطع الراس
منعوفك يحسين / منعوفك يحسين
★★★★★★★★★★★★
الشاعر (أسعد قاسم الكريعاوي)
قصيدة رقم 25
لا تعاندنه . لا تعاندنه . جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,,,,,,1
احنه بالشدات نعله ومانذل . - احنه وكت التشتعل كول وفعل
الموت ضوجناه وماخفنه القتل .- تمل من عدنا الحروب ومانمل
حسين قائدنا. جنود ابو السجاد احنا لاتاعندنه
,,,,,,,,,,,,,,,,,,,,,,,,,,,,,,,,,,,,,,,,,2
بينه حتى الكاع صاحت ياهله .- هلا بانصار الشهيد بكربله
لو نريد السمه نوصل نوصله . - كلشي نكدر احنا اهل المرجله
تريد تنشدنا. جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,,,,3
الرتبه فوك اجتافنه نكتب حسين . واسم زينب ينكتب فوك الجبين
حتى نعرك غيره احنا الثائرين . الغيره من تصعد نشك حلك السنين
بسمه جاهدنا -. جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,,4
احنا متطوعين انصار الشهيد كل اجازة وكل تقاعد مانريد .
احنا جيش حسين نهديله الوريد مانذل بكل عصر نلعن يزيد .
الفعل شاهدنا . جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,5
والشهادة هي بينة تفتخر . اتدور علينه الشهادة ومن تمر
بيهه اهلن صحنه نكرم العمر . احنه منحرنه ذبح سيف الشمر
غيره ماردنا. جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,,6
احنا جيش منظم وكله احترام . كربله النه اصبحت باب النظام
احنا عسكر شايل سلاح السلام . دوم واجب عدنا مانعرف ننام
ابدربة موعدنا. جنود ابو السجاد احنا لاتعاندنه
,,,,,,,,,,,,,,,,,,,,,,,,,,,,,,,,,,,,,,,7
موجديد اعلينة ياجرف الصخر . احنا لجل حسين ذوبنه الصخر
مانشيب احنه شيبنه الدهر . وكف حتى الموت من اعتذر
يالتشاهدنه -. جنود ابو السجاد احنا لاتعاندنه
------------.الخادم حيدرموسى الخفاجي الرميثي------------
قصيدة رقم 26
▪20▪ للحرب من نستعد ☆ ☆ الموت مايلحك يعد
اونعشك السوح الحرب - يازينب ☆ الغيره تفزع من نهب - يازينب
------------------------------☆☆☆☆☆---------------------------
1 ) من نطب سوح الحرب تحجي المراجل
اوكل فرد بينه اسد عالجيش نازل
كلمن ايفكر يمر خدرج يحاول
نكطع اجفوفه وحك جف أبو فاضل
☆ احنه انصار الولي ☆☆ أومنه اطلبي اتدللي
كبل لا دمعج يصب - يازينب ☆ الغيره تفزع من نهب - يازينب
--------------------------------------------------------------------------
2) شلون نقبل خدرج اتدوسه الحوافر
اوعابس اوجون اوبرير اليوم حاضر
كلنه دركه نصير نتلكه الخناجر
وكل فرد بينه تعنه ابروحه ناذر
☆ قسم يازينب قسم ☆☆ انصير ساتر عالخيم
شلون خدرج ينسلب - يازينب ☆ الغيره تفزع من نهب - يازينب
-------------------------------------------------------------------------
3 ) يلي كل الكون ماشايف خيالج
لاتخلين البجي ايمر اعله بالج
نعم كلنه انصير من نسمع سوالج
اوقسم كل الكون مايجرح دلالج
☆ كل فرد بينه ارتجل ☆☆ اعيونه تتجادح زعل
اشكد سهل عدنه الصعب - يازينب ☆ الغيره تفزع من نهب -يازينب
-------------------------------------------------------------------------
4 ) انطينه كلمه اوما نرد خطوه اوحياتج
اومانخلي النار توصل يم عباتج
فدوه كل ارواحنه اتروح الغلاتج
اوما نرد من الحرب إلا ابنجاتج
☆ مايمر بيج القهر ☆ ☆ اولايمر بيج السهر
كبل لا دمعج يصب - يازينب ☆ الغيره تفزع من نهب - يازينب
-------------------------------------------------------------------------
5 ) نعشك احنه أمن الأزل سوح المنيه
اوباجر اتسولف علينه الغاضريه
ذوله أنصار الولي الفزعو سويه
اورجفت صولاتهم كل ال اميه
☆ بالعدى اختل الوضع ☆☆ او حالهم حال الشمع
ذابو ابدار الغرب - يازينب ☆ الغيره تفزع من نهب - يازينب
----------------------------------------------------------------------------
6 ) والله مانقبل تمر بيج المصيبه
اوكلبج ايفارك يبت حيدر حبيبه
كلمن ايناديج بالطف الغريبه
امجتف اكبالج وحك واسمج نجيبه
☆ كربله طول ابعرض ☆☆ ايموت كلمن يعترض
والمتن ماينضرب - يازينب ☆ الغيره تفزع من نهب - يازينب
---------------------------------------------------------------------------
لخادم أهل البيت ع -- أبو أحمد المجراوي 07805007942
( الإنصار)
قصيدة رقم 27
#رئيسية
يم خيمة انصاره اعتنه وتلكته بهمه
يبن الصـــميده رايتك ماتنزل القمه
ماتنحني رايتك ... خلينه عد يمنتك
....................
اتعنه يم خيمة حبيب حسين والحـــسره
بعيونه بانت والكلب معصورالف عصره
ويكلهم انتم علعهد ياشـــيعة الزهره
هاذي المنيه كربت كل واحـــد وعذره
الكوم راسي رادته ما طالبت دونه ---- ثارات الهم من بدر وحنين مدفونه
روحي فده الركبتك ------ خلينه عد يمنتك
---------------------------------------------------------------
كبَــــــر حبيب برايته وتعنه انصاره
ناداهم بلــــهفة محب والموت ايثاره
كاللهم ابن المرتضى يتنطر اخباره
حسين عازم علحرب والموت خطاره
يلله يشيعة حيدره هلساعه ساعتكم ---- زينب تناطر للخيم وتشوف جمعتكم
انخانه وبنخوتك ----- خلينه عد يمنتك
..................
من شاف همتهم شرف للموت شرايه
خلونه يم زينب نشد كاللهم الرايه
ناداه عابس وانتفض يامحلى الحجايه
زينب اروحـلهه زحف يحسين عنايه
كللهه عابس مايرد ذب درعه وهدومه ---- يحسين احنه برايتك والرايه ملزومه
غيرتنه من غيرتك ---- خلينه عد يمنتك
----------------------------------------------------------
يم خيمة الحره اجو واحدهم بميه
وسيوفهم فوك النحر والغيره ثوريه
نادوهه يازينب وحك خدرج وطاريه
صولتـــنه تبقه للابد صوله حسينيه
ارواحنه زينب الج فدوه نقدمهه ---- وحسين يشهد خيمتج محد يمر يمهه
اعلن بعد ثورتك ----- خلينه عد يمنتك
-----------------------------------------------------------------
ياليل كافي طـــولت كامو ينادونه
عشاك احنــــه للنحر باجر يزفونه
وحسين بينه يفتخر ونكحل عيونه
وزينب شرفهه ينستر بدمانه مامونه
نكتب عهد وي النصر بالدم مضامينه ---- حسين بيد الطاهره يرفع اسماينه
احسبنه من شيعتك ---- خلينه عد يمنتك
خادم اهل البيت خالد العلمي
قصيدة رقم 28
الليلة السادسة ...لمت عزه لأنصار الأمام الحسين عليه السلام...
حسيننا حسين / حسيننا حسين
★★★★★★★★★★★
ياليلة الأنصار / بيها أشكثر أخبار
أنصار أبو اليمه / ثاروا على الكفار
والله ونعم منهم /ماقصروا الأحرار
أنصار أبو السجاد/والله ونعم الأنصار
حسيننا حسين / حسيننا حسين
★★★★
هوّس حبيب وصاح/يم خيمة الحره
ناده يبت حيدر / لا تبقي متحيره
لا مانعوف حسين/لآخر دمه وقطره
عاهدنه أخوچ ولا /منعوفه والزهره
حسيننا حسين / حسيننا حسين
★★★★
وأخوت أبو فاضل/عبد الله وي جعفر
عون البطل ويصيح / آنه إبن حيدر
جون وبرير وقيس/ نافع زهير أوحر
عابس يصيح بصوت/أله أگضي عالعسكر
حسيننا حسين / حسيننا حسين
★★★★
منهم أخذنه دروس / وتخرجّت أجيال
داسوا على داعش/ذوله الحشد الأبطال
من صحن أبو الأكبر/فتوى نطت الأرجال
زلمه الذي خطها / والله ونعم من گال
حسيننا حسين / حسيننا حسين
★★★★★★★★★★
الشاعر (أسعد قاسم الكريعاوي)
قصيدة رقم 29
جرح طه انرتله - كربله ياكربله
,,,,,,,,,,,,,,,,,,,,,,,,,,,,,,,,,1
كربله يم المصايب والحزن والعبره
نزل حتى السمه يمج كام يلطم صدره
انتي قرآن المصايب بيج دم العتره
الدنيا والاخرة تلتم كلها يمج تقره
والمصايب والبله - كربله ياكربله
,,,,,,,,,,,,,,,,,,,,,,,,,,,,,,,2
بيج زينب تبجي ضلت والخيام احتركت
كربله حتى الرضيع و سكنة برضج عطشت
بيج كطعو كلب زينب والجفوف انكطعت
ابو فاضل طفو عينه والشمس ماطلعت
ابو فاضل مقتله - كربله ياكربله
,,,,,,,,,,,,,,,,,,,,,,,,,,,,,,,,,,,,,3
دوم بالعبره نكصدج زينب انواسيهه
زينب المظلومة نبقى دوم نبجي اعليهه
نمشي يم حسين نبجي بلكت انلاكيهه
دموعنه انجمعهه الهه وبيدهه انوديهه
بالدموع السايله - كربله ياكربله
,,,,,,,,,,,,,,,,,,,,,,,,,,,,,,,,4
كربله ترابج تجنن تختنك ذراته
سحك جدم حسين فوكه بيج اثر طبعاته
على اترابج صرنه نسجد والمحب سجداته
ياحسين تنادي كامت بالصلاة ركعاته
كل عمل يتقبله كربله ياكربله
,,,,,,,,,,,,,,,,,,,,,,,,,,,,,,,,4
نلطم اعله حسين نبقى ومحد يغيرنه
حسين عايش يبقى بينه بغيره مافكرنه
للامم طيب وشجاعة وبس فعل صدرنه
احنا غير حسين ايه كلشي مارتلنه
والمصاب انسجله كربله ياكربله
..............................
الخادم \ حيدرموسى الخفاجي الرميثي
قصيدة رقم 30
نزلة
انصاري صلو صلات التظحيه جماعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
اطمئني خويه زينب مزامط وعندي زلم
انتشروا اباب المخيم رسمو الخطه رسم
شالو الرايه بديـــــهم واعتلت فوك النجم
وزره شدوهه العمايم كـــفو منهم والنعم
انصاري للحومه نزلو كلهم ابقناعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
سمعو الحر الرياحي صاح خلصتو الفرض
الخيم هايه عرضنه انموت من اجل العرض
الدنيه غداره نعرفهه وخيط اللهه مانكض
حسين يسوه انموت لجله اسمه قراءن النبض
انصاري من الخيانه بدمهم المناعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
كَام شيخ انصاري شفته وخطب بيهم خطبه
كَومو هوسو اكَبال زينب لا تحس ابــــــغربه
الشمر من شاف ربعي بـــــقه لازم كَلبه
الماي كَالو والله يحلم كَبلك احنه انشربه
انصاري شوفو حبيب بموت زارع كَاعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
صاح عابس اجه دوري ارد اهد ابواهس
خلهم ايـــــكَولون عني حسين جـــنن عابس
ذب قميصه وبرز ليهم ودرع لا ما لابس
كَال زيبنب عالمخيم عينـــتــــني حارس
انصاري وكَفت شرف وكَفولي هاي الساعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
بصف زهير وجون واكَف الهــــــلاالي ابسيفه
نجيبلج ماي الشريعــــه الشمر يحجي ابكيفه
شفــــنه باب الجنه بيده حسين يــــــكرم ظيفه
نموت كلنه وكَمنه نحلم نتاني جيت طيــــــــــــفه
انصاري كلمن كتبلي قصه عن وداعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
باجر ابصفي يزينب راح اشوف اكَبورهم
بكثر ماعدهم كرامه تجي الجنه تزورهم
باقي يتجدد ذكرهم كل سنه بعاشورهم
الواحد وسبعين غيره نزفت النه انحورهم
انصاري بيوم الحشر بديهم الشفاعه
انصاري الله تارسهم وفــــــه وشجاعه
\\\\\\\\\\\\\\\\\\\\\\\\\\\\\\\\\\\\\\\\\\\\\\\\
تمت ------ علاء الزيدي
تعليقات
إرسال تعليق