قصيدة رقم 1
(محمد الابراهيمي)لو يشح عن ابواليمه زادنه
لونعرف انبيع كل اولادنـــه
كلمن يصيبه بلاء زاد ابو اليمه شفاء
************
استمع مــني روايـــه موبعــيده بـــل قريب
جان واحــد لـبو اليمه مثل عابس وي حبيب
جان ذايــب بالمصيبه يذوب ويــرد ويــذيب
وحب ابو السجاد فعلن جان للطايـــح طبـــيب
سبل الماي بخرير عيونه
هذا عاشك ابد لا تنسونه
جانه عاقدله الولاء زاد ابو اليمه شفاء
************
ومن اجه بضيمه محرم أرخه للمدمع عيـون
يريـــد يطبخ لبو اليــمه وهوه مايملك شـلون
يسئل ابمــرته بــمراره حال عابس بالـجنون
انبيع أبنه وشنهو رايــج والكلب طاح الحنون
أنبيع ابنه وفدوه لبن الزهره
مرته كالت لو نبيعه مقصره
انبيعه ويحل البلاء زاد ابو اليمه شفاء
************
وجره من ايده الحنينه بالنخـــاسه وكــفــه
أرد ابيع وليدي هــذا لجل مذبوح القـــفه
أنريد نطبخ لبو اليمه وحال وكتي ماصفه
يبو اليمه شلون بعته علي مثل الــصطـفى
وجاله شراي وحسبله حسابه
والوليد بدمعتــــه السجابـــه
صاح يحسين الفداء زاد ابو اليمه شفاء
************
والموادع صار اصعب شلون وادع جبدته
الابــو والابـــن تـــدري بدمعه يمسح دمعته
وراح عنه شلون روحه وأختفه عن شوفته
وراح اكلك منو الشاري وانته تعرف قيمته
واشترا منه هذاك الضامي
أخو عباس البطل والحامي
الخدمه ماتمشي هباء زاد ابو اليمه شفاء
************
ومن رجع خالي البيته مرته من همهه تحوم
تكول ياهو اشتره وليدي وصبت العبره بدموم
يكول لجل حــسين بعته وخلي لـــو لايم يلوم
وراح اجيبن زاد بسمه وصار بالحسره يكوم
ولنه طب وليدهم بالخوفـــــه
يصيح بويه حسين ابد لتعوفه
حسين بجه اهل السماء زاد ابو اليمه شفاء
************
شبك أمه ومن دمعهه بجت افلاك الــسمـــه
يمه الحسين اشتراني وصارت تشمه بــفمه
يمه ردك ابو الـــيمه والنعم مـــن فــاطمــه
حيل محتارين بــمره شلون ظل فايض دمـه
والابو بجفه يحس دمعاته
ببو اليمه تشابهن جلماته
والفقر اصبح غناء زاد ابو اليمه شفاء
************
الشاعر
محمد الابراهيمي
قصيدة رقم 2
قصيدة.. هلال محرم
هليت يهلال
واذكرت الاحبال
واتذكرت ذيچ المحن.. زحمه الفواطم ينسبن
واذكرت الاحبال.. واذكرت الاحبال
…………… ..
هليت يهلال الحزن ريتك عسن ما هليت
يالذكرتني بغربتي ونار المصايب وجيت
واتذكرت چنه سوه وياريت نرجع ياريت
بيت ام الحسين الوطن وهيه الضوه بذاك البيت
تذكرت الاحباب
من طال الاغياب
وينچ صحت يم الحسن.. زحمه الفواطم ينسبن
واذكرت الاحبال.. واذكرت الاحبال
…………… ..
يهلال مليت الصبر وامن الحزن شاب الراس
ومگيده ايدي ابحبل وتشمتت بيه الناس
اتلفت او انظر كتر ساعه ويجيني العباس
بس راسه شفته اعله الرمح وجسمه بحوافر ينداس
گتله انهض بساع
يا حلو الاطباع
إلحگ خواتك لو مشن .. زحمه الفواطم ينسبن
واذكرت الاحبال.. واذكرت الاحبال
………………
يهلال عاشور ابألم كل ذكره منك تنعاد
أذكر رقيه مگيده وسكنه بحبلهه تنگاد
ما ظلت اعلينه خيم ظل الخيم صار ارماد
بعيوني اطفال او حرم وبظهري سوط الجلاد
وامتوني تنجاس
الحگ يعباس
يالسفرت بينه الضعن .. زحمه الفواطم ينسبن
واذكرت الاحبال.. واذكرت الاحبال
……………… ..
كل لحضه من عندك تمر والدمعه تجري امن العين
ها يلخذت مني اخوتي خليني اودعهم زين
خليني اشتم الترب هذا العطر عطر احسين
دليني درب المشرعه مشتاگه ابوس الچفين
مشتاگه العيون
للما يردون
بيهم اسف خان الزمن .. زحمه الفواطم ينسبن
واذكرت الاحبال.. واذكرت الاحبال
……………… ..
حنيت لتراب المشو يا ريت الايام تعود
وبجال اخوتي مدللة ومخدره بذاك الزود
هسه انسبت زينب صدگ وين اليصل حامي الجود
ويگله حرگوهه ودروا راعي الخيم ما موجود
ويخبره بالصار
من شبت النار
من داروا اعليهن بچن .. زحمه الفواطم ينسبن
واذكرت الاحبال.. واذكرت الاحبال
……………… ..
خادم الحسين
حسام ناجي الحلي
قصيدة رقم 3
بسم الله الرحمن الرحيم
كربلاء حسين اجاݘ امن المدينه كربلاء
كربلاء رايتـــــــــݘ رايه حزينه كربلاء
يالثارات الحُسين نصرخ ابلوعه وأنين
*
من طلع ظعن الهواشم وهاجر امن ارض الوطن
مهجت الهادي وحبيبه مصحـــف ويحدي الظعن
طالع وقصـده المنـــيه دﮔت اجـــــــراس الزمـن
يعرف حسين ابمصابه و يـــندفـــــــــن وبلاكفن
بالعــراء جسمه يتـــــوسد يعرفه بالعراء
أنبـــياء تزوره والمدمع تـذرفه أنبــياء
عنَدَ ذي العرشِ مَكين نصرخ ابلوعه وأنين
*
كل بني هاشم أضاحي ﮔـبـــــله تصـبح عالترب
أول الأكبر يقــــــــدمه فـﮔده مـوهـــــين صعـب
والعفه عالدنيه بعــدك ايـــﮔله مفجــوع الــﮔلب
ضامي يرحل وبرحيله ﮔــــــــــلبه لجله ينكرب
أشقياء تفجــع حسين ابغـــــربته أشقياء
والعناء ابدمه تتخضب جــــبهته والعناء
والأجل دم الجبين نصرخ ابلوعه وأنين
*
يفــﮔد انصار العقــــيده ومنهــــم الشيــبه حبيب
ينجرح ﮔلبه الــــفـﮔدهم وجرحه موهين يطــيب
وتالي يبقه ابغربه وحده ســــــــاعد الله الـغريب
ينذبح روح الزݘـــــــيه والـجسد يصبح سلـيب
ابلاحياء تحــــرﮔ اعداءه خيامه ابلاحياء
والنساء تنسبي بعــــــده اليـتامه والنساء
تنولي امن الظالمين نصرخ ابلوعه وأنين
*
رايته اترف بالعـــــــوالي اترفرف ابݘــــف الـﮔمر
ماتطيح امن ايدي حاشه زوده من فارس مـضـر
إلّه تتــــﮔطع ݘفـــــــوفه ينــــــــــغدر يـــم النهر
والحُسين ايهل دمعــــته وينحـــــــني منه الظهر
بالـــبكاء يعلــــــــن الآمه وحـداده بالبكاء
والبــلاء يـــــــــنختم ويّه الشهاده والبلاء
يفـــــﮔد الأخ المعين نصرخ ابلوعه وأنين
*
للأبد تبقى المـــــــــــآتم ابكل محــــــــــرم للذبيح
تحضر الـزهره الشفيعه والـﮔلب دامي وجـــــريح
ݘني بيهه ابدمعه تصرخ امن الحزن يمته استريح
يبني يحسين لرزيـــــتك دمــــــعتي من دم تســيح
حـــزني داء واصبح ابـﮔلبي مݘانه حزني داء
والــــــرجاء يظهر المهدي رجـانه والـرجـاء
ايداوي دلالي الحزين نصرخ ابلوعه وأنين
*
تمت بعون الله تعالى وفضلهِ وإحسانه والحمدلله رب العالمين وصلى الله على محمدٍواله الطيبين الطاهرين
وعجل الله فرجهم اللهم صل على محمدٍوال محمد
حيدركريم جارالله الكربلائي
قصيدة رقم 4
(ميمر) سيد علي الموسوي
الدمعه ابشهر عاشور من اتهلهه
تختلف عن طعم المدامع كلهـــــه
ـــــــــــــــــــــــــــــــــــــــــــــــــ
شهر المصيبه يختلف عن لشهـــــور
تنحب ملائكـــــة السماء ابعاشـــــور
اتنوح الزچيه اعله القميص المنشور
اتون وليالي المضلوم...بالونّه تستقبلهه
ـــــــــــــــــــــــــــــــــــــــــــــــــ
تستقبل الزهــــره ليالــــي الأحزان
بالحسره واتقيم العزه ابكــل امچان
وينه اليساعدني عله ابني العطشان
وتنادي يحبابي العين...غير المدامع شلهه
ـــــــــــــــــــــــــــــــــــــــــــــــــ
غيــر المدامـع شلهه يحبابــــي العين
كـــل المصايب هانت ابيـــوم حسين
والصبر يتحصل عله امصابـه امنين
كثره النوايح بس هاي...كل نايحه اتهون الهه
ـــــــــــــــــــــــــــــــــــــــــــــــــ
نتنطــر اهلال الحــــزن والآلام
ايام حســـــــره وتختلف عالايام
بين الطفوف الفاجعه وبين الشام
تتكفل الحره اعيال...چان الگمر كافلهه
ـــــــــــــــــــــــــــــــــــــــــــــــــ
يكسر خواطر هالشهر ياذينــه
اهلال المحرم من يهل اعلينـه
مضمون أجرك يامن اتواسينه
هاي المآتم ياناس...بگلوبنه انسجلهه
ـــــــــــــــــــــــــــــــــــــــــــــــــ
ام الحسين المنكسر خاطرهـــــه
ابهاي المجالس والعزه نجبرهـه
بل ونه ودموع الحزن نحظرهه
خدامچ وماناسين...يم الحسين انگلهه
*****
سيد علي الموسوي
قصيدة رقم 5
آنه زينب....شفت الهﻻل وصحت
آنه زينب.....للخيم صار الوكت
آنه زينب......آنه زينب.....آنه زينب
.....................................................
لسه أمن الضلع عندي مواجع
يهﻻل اني زينب بيه سامع؟ ؟
بس ابشهرك أتفگد اصابع
ﻷن كل عام خنصر النه ضايع
انه زينب. . ..دمع للطف حضرت
انه زينب.....للخيم صار الوكت
انه زينب.....انه زينب.......انه زينب
.................................................
اذا تسألني شأتمنى من اﻻحﻻم
ماتحترك كون احتاج الخيام
وبالطف كل سنه تحرجني اﻻيتام
ليش بكربله ما يكعد النام؟؟
آنه زينب. ...بيه مابيه افزعت
انه زينب. ....للخيم صار الوكت
انه زينب......انه زينب......انه زينب
................................................
من طف المضى واسمعها مني
لسه من السبي يوجعني متني
واليسأل اعله الكافل لچمني
ما شايفته بجفوفه بعدني
انه زينب..... ﻻبو الغيره حشمت
انه زينب......للخيم صار الوكت
انه زينب. .......انه زينب.....انه زينب
........................ .................. .............
توصي السوط احلفك بيش يهﻻل
ما يدنى ابد لمتون اﻻطفال
وبدين التدعي ل(الله)اشعدها اﻻحبال
الشتم مرات هم يصير چتال
انه زينب. .....زحمه اگول اتشتمت
انه زينب......للخيم صارت الوكت
انه زينب ......انه زينب. ...آنه زينب
......................................................
بعرس الطف حزنه ما فرحنه
منين انجيب ماي وعدنه حنه
قبل العرس وأترملت سكنه
ومن دون الشمع طافي شمعنه
انه زينب.......شمعه نادتني متت
انه زينب. ...للخيم صار الوكت
آنه زينب. ....آنه زينب.....آنه زينب
................... ....................................
كون اتلگه يوميه المنيه
وﻻ اسمع ينادوني السبيه
وكثر مادورت طاحت اديه
ماشايفها ترجيه رقيه؟؟؟
آنه زينب. ...عل الجرالي اتلوعت
آنه زينب......للخيم صار الوكت
آنه زينب. ......آنه زينب. ....آنه زينب
........................................................
احمد ماجد الكﻻبي
تمت الكتابة//٢٠١٦
قصيدة رقم6
قصیدة(شهر الأحزان)
ابشهر الأحزان ناصـب المهدي عزاء
ابشهر الأحزان انخسف بدره ابسماء
آه واویلاه آه واویلاه
🍂🍂🍂🍂🍂🍂🍂🍂
اندفنــت ابگلبا صـور مـن شهـر عاشوره
عایشه ابفکره وخیالـه ولله هاي الصوره
الدمعــه متفارگ عیونه علوجـن منثوره
روحا تارسهه الحـزن کل وکت مکـدوره
ابشهر الأحزان یـذکر الکــرب وبلاء
ابشهر الأحزان ناصـب المهدي عزاء
آه واویلاه آه واویلاه
🍂🍂🍂🍂🍂🍂🍂🍂
لوبـزغ شهــر العــزء بلغـروب اهلاله
تصبـح اجـروح الأســه تنـزف ابـدلاله
یرتــدي ثوب الحــزن ولکـدَر بحوالـه
سبــي زینــب عمتــه مایفـارگ بالـه
ابشهر الأحزان الولــي حــدد رداء
ابشهر الأحزان ناصـب المهدي عزاء
آه واویلاه آه واویلاه
🍂🍂🍂🍂🍂🍂🍂🍂
ویه کل موکب یدور یضرب اعلی الهامه
ویـه کل ملــه وخطیــب ینگـل ابآلامه
ایردد ابونــة نعــي ولحــزن بلثامــه
للخــدم بعـد العــزء ایقســم ابأوسامـه
ابشهر الأحزان للخَـدَم ثبـتْ وفاء
ابشهر الأحزان ناصـب المهدي عزاء
آه واویلاه آه واویلاه
🍂🍂🍂🍂🍂🍂🍂
ایجدد امصاب الحسین ولجره بطفوفه
مجلس ابمجلس یجـي ودمعته مذروفه
یذکر العــم الوفـي وحملتـه الموصوفه
علشریعــه اهل الغـدر گطعوها اچفوفـه
ابشهر الأحزان تصبح ادموعه دماء
ابشهر الأحزان ناصـب المهدي عزاء
آه واویلاه آه واویلاه
🍂🍂🍂🍂🍂🍂🍂🍂
ابفکـره طابعلــه اثــر عاشـر ابعاشوره
لوعــة اطفـال وحــرم ولعـده مسروره
احسین علغبره طریح ویـه کل ابدوره
ولحـرم گامــت تفــر ولبـوادي ادوره
ابشهر الأحزان صیحه وعویل ونداء
ابشهر الأحزان ناصـب المهــدي عزاء
آه واویلاه آه واویلاه
🍂🍂🍂🍂🍂🍂🍂🍂
✍حمید خنفري
قصيدة رقم7
هلاليه
شهـر عاشـور ريته لالـفه اهلاله شفت لوعات شفت اعيون همالـه
ــــــــــــــــــــــــــــ
يريت هلال شهرك لالفه ولامــــر بي گلب العدوبچتل العجيــد انســر
وكل گلب اليحب حسين بيه انطر وسهـــام العــده ياويلـــي چتالــــه
ــــــــــــــــــــــــــــ
يريت هلال شهرك لالفه اعلـــيه عليه مادريـــت اشصار وشبيـــــه
عطش واطفال والتربان ذاريـــه يويلي حسين منه راحــت عيالـــه
ـــــــــــــــــــــــــــــــ
يعاشور وعساك ولالفه شهــرك وريت الموت بداله شالك وطـــرك
لفيت وجيت ماندري شنو سرك اثاري الموت بيــــك امبين اعماله
ــــــــــــــــــــــــــــــــ
انمحه يومك ريته ولابقه منـــه ولاينعـــــد ليلك وانحچه عنــــــــه
غم وظيم واللوعات لبسنـــــــه منك ياشهر ميشــــوم بهلالــــــــه
ـــــــــــــــــــــــــــــــــ
شعد ساعة ونس منك فلا الگـــــه عشتهه بجور والام وظمه وحرگه
بيك احباب گلبي عرفت الفرگـــــه مشوا عني وظلت يمي اطفالــــــه
ـــــــــــــــــــــــــــــ
لفيت اشلون وايامك مرار وظيم بالگيــظ وشمسهه مر علينه الغيم
ونيرا العده وسط الخيام اجيــــــم ياعاشـور ريتك مرمي بحبالـــــــه
ـــــــــــــــــــــــــــــ
رمه احبال الاسر بينه وتعــــذبنـــــه على الهزَل لبن ازياد مــــن رحنـه
كل عمري شفت لاماشفــــت محنـــه مثل عاشور هضمه وظيمه واهواله
ـــــــــــــــــــــــــــــــ
خادم الحسين ع
الحاج ابو اياد البيجاوي
قصيدة رقم8
هـليلــه الحـــزن اصـدر قــراره
وعـــاشــور بألـــم بيــن نهــاره
مصيبة كربله منين لخذت مني الحسين
وصابت كل كلب جمرت وحراره
&&
نصيح بصوت وينه أليعدل الجور وهـــــــل المــصيـــبه
عاشـــور أبتده وياويلــه عاشــور بكلبــي أصبح لهـــيـبه
مـن تــنعه المـنابـر طاح الحسيـن شحال الــي غــريبـــه
لا كــافــل يـــضل اولا ولــي يعيـن بـس راس ونــحــيــبه
وذكر يوم الحسين وصيحن ياعلي وين
اهات وحزن بين مراره
&&
هليــله الحــزن لبسنه عاشـــور ثـوب أوبـي بجينه
موجر كل كلب عينه عله عباس وي زيــنـب ونـيــنه
صعبه لبحـرب يـــرحله جــفيـــن ورمــاح ابـجــبـيـنه
ضلت جربته اوعينه على لعيال يــوصلـها بحنـيــنه
راسه اوجفه للدين ضحه لشيعة حسين
وحسرات وألم وكثر مراره
&&
ناحـت بالمنــابــر اه يالحــسيــن ومصــاب العــلـيــله
تــهــل دمـعنـــه للظلت بالديار والام الــعــقــيــلــة
لــو رد الظعــن لـــديار الحسين أوتــتـلـكه الأصـيلـة
شنهي المعذره لوصاحت حسين كــل دمعـــك تسيــله
وتنادي اعله لحسين ابوي وكرت العين
وزاد الهه المرض من انتضاره
&&
خادم خدام اهل البيت الشاعر الحسيني
قصيدة رقم 9
سيد علي الموسوي
لو شهر عاشــور هـــل اهلالـه
المهدي سبحان الله يشبه حاله
محني ضهر المنتظر...يشبه اهلال الشهر
ـــــــــــــــــــــــــــــــــــــــــــــــــــــــــــــــ
اهلال الفجيعه من يهل...شايل عله امتونه صـور
أول علامه للحــــــزن...لمن يهل محني الضهــر
مرسوم بعيونــه الهظم...واجروحه تنطينه خبـــر
مهدينه يشبه حالتـــــــه...ياحسرة المحني الضهر
محني ضهره وتجري دمعة عينـه
هذا شهر البــــي يطيــح حسينـــه
حالته اتفت الصخر...يشبه اهلال الشهر
ـــــــــــــــــــــــــــــــــــــــــــــــــــــــــــــــ
اليتمعن ابهذا الشبـــــه...يشعر ابكل معنــــه الألم
ويعيش حسرات وقهــر...لمـن يحس حيلــه انهدم
هيچ ابوصالح يابشـــر...عايشهه من حرگ الخيم
امبين عله العاش الجرح...من دمعته اليجريهه دم
هالمصيبه العمره عايش بيهه
ابدال دمعاته دمــــه يبچيهــــه
هالجرح تارك أثر...يشبه اهلال الشهر
ـــــــــــــــــــــــــــــــــــــــــــــــــــــــــــــــ
تخلص الدنيه وكل أمـــر...وهمومه ماتخلص بعد
الشايف وضع طف كربله...كل عمره مايفرح أبد
الشايل معانات السبــــي...يگضي حياته ابلا سعد
الله يعيــــن ابــن الحسن...كافي عليه حرگ المهد
اشلون يتهنه ويعيش ايامــه
الشاف الاكبر طايح وجسامه
عالشباب ايون قهر...يشبه اهلال الشهر
ـــــــــــــــــــــــــــــــــــــــــــــــــــــــــــــــ
يلچم جروحــه وينتحب...لمن يشوف البالسمــه
محني مثل حالـــه يهل...وينادي يابن فاطمــــه
أملاك ضجت بالبچي...نشرو قميص البي دمـه
ثوب العزيز العل ترب...ونار الدوت بمخيمــه
هايـه أم حسين تنعه الغالي
وآنـه وياهه تغير حالــــــي
آ يمگطوع النحر...يشبه اهلال الشهر
ـــــــــــــــــــــــــــــــــــــــــــــــــــــــــــــــ
يتزايد اعليه الحـــــزن...كلما تمـــــر لوعة هلـه
لهلال يرسمله صــور...كل الجره ابطف كربلـه
يذكر سبي وجود ونهر...ينحب يراعي المرجلـه
يابالفضــل يابالفضــل...عگبــك سبوهــه العايله
ضهره كاسرته المشت مهضومه
وعافت اخوتهه وذر بالحومـــــه
اليفگد ابدور وگمر...يشبه اهلال الشهر
****
سيد علي الموسوي
قصيدة رقم 10
من يهل عاشور وتبدي ايامه
تلكة ابكل بيت مخيمة الامه
:::::؛:؛؛؛؛؛؛::::::::؛؛:
من يهل شهر الحزن يبدي السواد
وعلى الشيعة تبتدي ايام الشداد
وتلكه ابكل بيت معلون الحداد
وبيه كل شيعي تنعدم احلامه
------------------'--------------
من يمر عاشور يترك بينه إثر
ونبجي لحسين البجه عليه الحجر
وكل كلب شيعي على حسين نفطر
ونبقة باسم حسين ناشرين اعلامه
////////////////////////////////
من يمر كل شيعي يجريه الدمع
وكلبه لجل حسين تلكاه منصدع
والعزه عليه دائم وماينقطع
ولجله كل شاعر تكتب اقلامه
$$$$$$$$$$$$$$$$$$$$$$$
من يمر شهر المصايب والمحن
تلكه بيه حته الطفل ون وحزن
حته النسوان وي زينب بجن
وعله حسين انوح نظل وايتامه
//////////^^^^^^^///////////////
الشاب والشايب تنوح بمجلسه
تبجي وتون بجزع كل شيعته
تواسي ابن خير الملا بمصيبته
وتفني كل اعمارهة خدامه
::::::::::":::::::::::::::::::::":::::::::::::::::::::
عليه نبجي شمابقه بينه عمر
ونلطم اعله حسين مقطوع النحر
نبقه خدامه على طول الدهر
ونفتخر والله احنه خدامه
-----------------------------------------
اللهم تقبل منا هذا القليل ........
الشاعر بلال الدراجي
تعليقات
إرسال تعليق