قصيدة رقم 1
أول إبعاشــــور هاليـــــــوم === ندخل إويـَه إحسين للحوم
ما نسينه === ما نسينه
ــــــــــــــــــــــــــــــــــــــــــــــــــ ـــــــــ
عاد عاشور إو إجانه إو ما نسينه
والتعازي الزهرة الهادي نبينه
وإحنه لحسين الأبي نرفع إدينه
نحيي أول يوم بالدمعه الحزينه
نزفت إجـــروح المواليــــن === من جـُرح عباس وإحسين
وإحنه جينه إبشوﮒ وإهموم === ندخـــــــل إويـَه إحسين للحوم
مانسينه === ما نسينه
ـــ
ما نسينه زينب الحـرّه الأبيــّه
من إجـَت ويــّه الكفيل الهاشميــّه
نزلت إبأرض الطفوف إو هاي هيـــّه
باﭼــر إتهل الرزايه إعلى الوفيـــّه
تدري زينب تنملي إجروح === واﻠﮔلـــــــب ينعــــاب وإينوح
كل موالي إوياها ﻣﻠﭼـــوم === ندخل إويـَه إحسين للحوم
ما نسينه === ما نسينه
ـــ
عادت أيـّام الحزن والآه ويلي
باﭼـر إتنادي العقيله ياكفيلي
إرجع إبليــّاك إنهد خويه حيلي
وإبتدت رحله طويله إبهذا ليلي
عــــــــــــــــــادت الآلام والآه === والحـُسين إشلون ننساه
فاز أبو السجـّاد مظلــوم === ندخل إويـَه إحسين للحوم
ما نسينه === ما نسينه
ــــ
عادت أيـّام المآتم والمواكب
وينك إحضر طالت الغيبه يصاحب
إحنه واجهنه إبعزم زيف النواصب
داعشيـّه اليوم إجونه إبجور لاهب
ما نسينه زود عباس === بالمواقــف نرفع الراس
والدرب للفوز مرســـــوم === ندخل إويـَه إحسين للحوم
ما نسينه === ما نسينه
ــــ
زينب إبهل يوم ما بين الهواشم
كلهم إيهتفون عد عيناﭺ فاطم
ما تشوف الطيبه زينب جور ظالم
نحمي عزها إو ما نذب هاي الصوارم
وإحنه جينه نذكر الصار === نوﮔف إبعز وﮔفة أحرار
ما نهاب الشر نظــــل دوم === ندخل إويـَه إحسين للحوم
ما نسينه === ما نسينه
ــــــــــــــــــــــــــــــــــــــــــــــــــ ـ
مع تحيات شاعر اهل البيت / جابر النجفي
قصيدة رقم2
آه يهلال .. آه يهلال .. آه يهلال .. آه يهلال
1
آه يهلال الحزن بحــر الدمـــــــــع منك نِـبَع
تدري ياعين ابطلوعــك منهه دم أحمر طلع
يا گلـُـب ويّاك يهــلال الحزن تـــدري انفجع
گلـُب طه وحيـدر وجفـــــن الزچية الي دِمَع
آه يهلال .. آه يهلال .. آه يهلال .. آه يهلال
2
آه يهلال المصايـب والمتـــاعـــــب والمِحَن
بيك آهات الخلايـق يا هِــلال الهَــــــــم بدَن
بيك حزن الأنبيــــاء ابكـــل تفاصيل الشَجَن
حين آل المصطفـى غـادِروا أحضان الوطـن
آه يهلال .. آه يهلال .. آه يهلال .. آه يهلال
3
آه يهلال اويه طلتـك تمطـــــــر الدنيـه ظلام
تلبس اسوَد كل معاني البوح وحروف الكلام
والشمس تتوشّح ابلـون الدمه ابنحـر الإمام
والسلام ابلا شعور يصيـح عالرحمه السـلام
آه يهلال .. آه يهلال .. آه يهلال .. آه يهلال
4
آه يهلال الغدر ياليــــــت ما يلفـــــي الصباح
بيك نيران الفشَـل تحــــرگ صواوين النجاح
بيك خير العمل يبچي لموت حيّ اعله الفلاح
بيك روس الخير والحگ ترتفع فوگ الرماح
آه يهلال .. آه يهلال .. آه يهلال .. آه يهــلال
5
آه يهلال الكَضو سبعيـن مطعــــــــون وذبيح
والزنيم اعله الجنـود الخيَم حِرگوهــه يصيح
والشمر بالسوط لمتون الحرايــــــــر يستبيح
والعليل امگيد وساعــــــة يگف ساعة يطيح
آه يهلال .. آه يهلال .. آه يهـلال .. آه يهلال
6
آه يهلال الدمع في عيــــن فاطــــم من جره
دمع من دم علغريــب ابيـــوم گطعو منحره
تشوف زينبهــا سَـبـيّه وباليتـامـــه امحيّره
غير چفين ابو فاضـل بالتــــــــراب امعفـّره
آه يهلال .. آه يهلال .. آه يهلال .. آه يهلال
7
آه يهـلال اشنِشوف ابكــل صـــور هالفاجعه
زينب اتقبِّل اخوها وتدري گـَـــرَّب مصرعه
وأم حزينه ويمهـا ابنهــا وبالـدموع اتودِّعه
وسكنه تنطر گمرهاشم يرجع امن المشرعه
آه يهلال .. آه يهلال .. آه يهلال .. آه يهلال
8
آه يهلال القهر مابيــن لوعـــــــات المصاب
لوعة ما صحّت مثلها ابكل بيان و كل كتاب
لوعة الطفل الرضيـع ابين أحضــان الرباب
منگطع نحره ابسهم ويلاه يهـــــلال العذاب
آه يهلال .. آه يهلال .. آه يهلال .. آه يهلال
9
آه يهلال الأسه ايضل ينذكـــر طـــول السنين
منه حتى الصخر أصبح ما يمـــل مـن الونين
أربع شبول الگضو فدوه الأجل عين الحُسين
وما وفيت اتصيح لسه ابكل شجنهه ام البنين
آه يهلال .. آه يهـلال .. آه يهـلال .. آه يهلال
زكي الياسري النجفي
قصيدة رقم3
هلال محرم ( النزلة ) عمار هليل الواسطي
يهلال النوايب ... يهلال النوايب ... مهموم كلمن طالعك ... يهلال النوايب
*******************************
من تهل وتلبس أسود هالسمــــه
تفجع الهادي البشير وفاطمــــــه
وينكسر كَلب الولي حامي الحمه
وهاي ما تحتاج أصلاً ترجمـــه
عالطف ومصابه ... عالطف ومصابه... مهموم كلمن طالعك ... يهلال النوايب
*******************************
الأنس والجان مفجوعه بحزن
شما عليهه بالقهر ليلك يجـــن
الكربله ولحسين واعياله تحن
هيجي موقف يفجع الدنيا شتظن
ويصيح واحسيناه ... ويصيح واحسيناه ... مهموم كلمن طالعك ... يهلال النوايب
*******************************
ريت لا هليت لا صار الكــــــدر
جم كَلب جم خاطر الليله إنكسر
هالسواد اللبسته هاي البشــــر
صوره عالأحزان من بين الصور
وبهاي المواقف ... وبهاي المواقف ... مهموم كلمن طالعك ... يهلال النوايب
*******************************
اليوم واحد من محرم من بــده
مهّد لأحزانهه بكل المـــــــــده
ويوم عاشر هذا تعرف موعده
منه يا ضيم وقهر بيهه إبتـــده
بشيعتنه الحزينه ... بشيعتنه الحزينه ... مهموم كلمن طالعك ... يهلال النوايب
*******************************
والله يهلال السمه كونك تشـــــوف
شلون مزدحمه المجالس بالصفوف
ريت ويه الي لطم قوسك يطـــوف
لكل جرح ينزف يريتك لو تروف
وبمجلس عزانه ... وبمجلس عزانه ... مهموم كلمن طالعك ... يهلال النوايب
*******************************
نحسب الأيام من نتنطـــــــرك
بالحزن والفاجعه نتذكـــــرك
ربنه بالأحزان لينه كَـــــدّرك
بيا امل يهلال لو نتصــورك
ماظلت أماني ... ما ظلت أماني ... مهموم كلمن طالعك ... يهلال النوايب
*******************************
من يمر عاشور يحتار الدليــل
يساعد الله كَلب زينب والعلــيل
من يشوفونك جرح عالي تميل
لكن بحكمه ودرايه امن الجليل
والهذا ننادي ... والهذا ننادي ... مهموم كلمن طالعك ... يهلال النوايب
قصيدة رقم4
(محمد الابراهيمي)
لو يشح عن ابواليمه زادنه
لونعرف انبيع كل اولادنـــه
كلمن يصيبه بلاء زاد ابو اليمه شفاء
************
استمع مــني روايـــه موبعــيده بـــل قريب
جان واحــد لـبو اليمه مثل عابس وي حبيب
جان ذايــب بالمصيبه يذوب ويــرد ويــذيب
وحب ابو السجاد فعلن جان للطايـــح طبـــيب
سبل الماي بخرير عيونه
هذا عاشك ابد لا تنسونه
جانه عاقدله الولاء زاد ابو اليمه شفاء
************
ومن اجه بضيمه محرم أرخه للمدمع عيـون
يريـــد يطبخ لبو اليــمه وهوه مايملك شـلون
يسئل ابمــرته بــمراره حال عابس بالـجنون
انبيع أبنه وشنهو رايــج والكلب طاح الحنون
أنبيع ابنه وفدوه لبن الزهره
مرته كالت لو نبيعه مقصره
انبيعه ويحل البلاء زاد ابو اليمه شفاء
************
وجره من ايده الحنينه بالنخـــاسه وكــفــه
أرد ابيع وليدي هــذا لجل مذبوح القـــفه
أنريد نطبخ لبو اليمه وحال وكتي ماصفه
يبو اليمه شلون بعته علي مثل الــصطـفى
وجاله شراي وحسبله حسابه
والوليد بدمعتــــه السجابـــه
صاح يحسين الفداء زاد ابو اليمه شفاء
************
والموادع صار اصعب شلون وادع جبدته
الابــو والابـــن تـــدري بدمعه يمسح دمعته
وراح عنه شلون روحه وأختفه عن شوفته
وراح اكلك منو الشاري وانته تعرف قيمته
واشترا منه هذاك الضامي
أخو عباس البطل والحامي
الخدمه ماتمشي هباء زاد ابو اليمه شفاء
************
ومن رجع خالي البيته مرته من همهه تحوم
تكول ياهو اشتره وليدي وصبت العبره بدموم
يكول لجل حــسين بعته وخلي لـــو لايم يلوم
وراح اجيبن زاد بسمه وصار بالحسره يكوم
ولنه طب وليدهم بالخوفـــــه
يصيح بويه حسين ابد لتعوفه
حسين بجه اهل السماء زاد ابو اليمه شفاء
************
شبك أمه ومن دمعهه بجت افلاك الــسمـــه
يمه الحسين اشتراني وصارت تشمه بــفمه
يمه ردك ابو الـــيمه والنعم مـــن فــاطمــه
حيل محتارين بــمره شلون ظل فايض دمـه
والابو بجفه يحس دمعاته
ببو اليمه تشابهن جلماته
والفقر اصبح غناء زاد ابو اليمه شفاء
************
الشاعر
محمد الابراهيمي
قصيدة رقم5
ياامامي وديني ابجي الك خليني
عمري عاشگ بس لطم وقراية
ابجي كد نهر الفرات وماية
واكصد العطشان شايل راية
كون يم بابة واطش سنيني
ارد أذوب بحضرته صبي عيني
خل يبجي الدنيا صوت ونيني
ابجي الك خليني
سر صلاة جفوفي يم أعتابة
الطم وانعه المصيبه ابابة
يعله صوتي حسين آ ... ومصابة
بلايه مجلس ما اريد ايامي
انذر سنيني لطم للضامي
دمعي يكتب عالخدود حسيني
ابجي الك خليني
ارسم بدمعي عله اعتابك نهر
جربه يمه ورايه حمرة وجف كمر
وخنصر من جفوف روح الله انبتر
وخيمه ترسم دمعتي لايتامه
شافت عيونه لهيب خيامه
وصاح ركضت زينب التأذيني
ابجي الك خليني
جمر يلهب رمل دامي وحر شمس
دنيا غيمه وصافي دخان النفس
تركض وتابعه بالسوط الرجس
للنهر صدت تحشم بالكفل
صاحت بعبرتها والمدمع يهل
واعدتني بغربتي تباريني
ابجي الك خليني
خويه جابو نوك والحادي ابتشر
جنها خلصت كربله وحان السفر
ظلمه صارت دنيتي وغاب الكمر
صرت ذكرى وجن بعد مااشوفك
والحدتني جفوف ماهي جفوفك
شلي بيها وماتشوفك عيني
ابجي الك خليني
علي طعمه البطاط
قصيدة رقم6
(محمد الابراهيمي)
لو يشح عن ابواليمه زادنه
لونعرف انبيع كل اولادنـــه
كلمن يصيبه بلاء زاد ابو اليمه شفاء
************
استمع مــني روايـــه موبعــيده بـــل قريب
جان واحــد لـبو اليمه مثل عابس وي حبيب
جان ذايــب بالمصيبه يذوب ويــرد ويــذيب
وحب ابو السجاد فعلن جان للطايـــح طبـــيب
سبل الماي بخرير عيونه
هذا عاشك ابد لا تنسونه
جانه عاقدله الولاء زاد ابو اليمه شفاء
************
ومن اجه بضيمه محرم أرخه للمدمع عيـون
يريـــد يطبخ لبو اليــمه وهوه مايملك شـلون
يسئل ابمــرته بــمراره حال عابس بالـجنون
انبيع أبنه وشنهو رايــج والكلب طاح الحنون
أنبيع ابنه وفدوه لبن الزهره
مرته كالت لو نبيعه مقصره
انبيعه ويحل البلاء زاد ابو اليمه شفاء
************
وجره من ايده الحنينه بالنخـــاسه وكــفــه
أرد ابيع وليدي هــذا لجل مذبوح القـــفه
أنريد نطبخ لبو اليمه وحال وكتي ماصفه
يبو اليمه شلون بعته علي مثل الــصطـفى
وجاله شراي وحسبله حسابه
والوليد بدمعتــــه السجابـــه
صاح يحسين الفداء زاد ابو اليمه شفاء
************
والموادع صار اصعب شلون وادع جبدته
الابــو والابـــن تـــدري بدمعه يمسح دمعته
وراح عنه شلون روحه وأختفه عن شوفته
وراح اكلك منو الشاري وانته تعرف قيمته
واشترا منه هذاك الضامي
أخو عباس البطل والحامي
الخدمه ماتمشي هباء زاد ابو اليمه شفاء
************
ومن رجع خالي البيته مرته من همهه تحوم
تكول ياهو اشتره وليدي وصبت العبره بدموم
يكول لجل حــسين بعته وخلي لـــو لايم يلوم
وراح اجيبن زاد بسمه وصار بالحسره يكوم
ولنه طب وليدهم بالخوفـــــه
يصيح بويه حسين ابد لتعوفه
حسين بجه اهل السماء زاد ابو اليمه شفاء
************
شبك أمه ومن دمعهه بجت افلاك الــسمـــه
يمه الحسين اشتراني وصارت تشمه بــفمه
يمه ردك ابو الـــيمه والنعم مـــن فــاطمــه
حيل محتارين بــمره شلون ظل فايض دمـه
والابو بجفه يحس دمعاته
ببو اليمه تشابهن جلماته
والفقر اصبح غناء زاد ابو اليمه شفاء
************
الشاعر
محمد الابراهيمي
قصيدة رقم7
علي الخفاجي
عشگنه وبي مجانين نموت بحب الحسين
نجي بعبره على الفطره
نموت بحب الحسين
*
أجينه وراية الحگ تمشي ويـانه
محـرم بالحــزن والدمعه نــادانه
ميثم مـايـمـــوت بگطعت ألـسانه
تعلگ عالجـذع ويصيح هـذا أنه
دفعنه الموت بالموت مناحـر تهتف بصوت
العشگ ذكره على الفطره
نموت بحب الحسين
*
نـريــد النـاس كل الـناس تـعـرفنه
مواقـف لـلـشــرف ظلت مـواقفنه
نخـوف الـمـوت مايـگـدر يخـوفنه
أحنه أجروح نحر حـسـين ينزفنه
أبـد مانرضه بالعار نــرد الـثار بالـثار
صور نقره على الفطره
نموت بحب الحسين
*
رخصنه ارواح والـدنيـه تـركـناها
مثل جـنـة ضـريحـك ويـن نلگـاها
هــاي الـذكــريــات نـعـيـش وياها
وقصة عاشگ ومعشوگ نقـراها
لگينه أچفوف عباس بعدهي تحيي بالناس
ونجي نخبره على الفطره
نموت بحب الحسين
مجالسـنــه تظل شـمــا يمـر بينه
صلاة الميت اعله الخوف صلينه
نــادانــه محـــرم وأحــنه نـادينه
أجيناك وتــركــنه ديــار أهالينه
أجينه نـقـدم نحور بـدت أيـام عاشور
بدت عشره على الفطره
نموت بحب الحسين
*
عـفـناهــا الــديـار وجينه عاهدنه
عن ذكـر الحبيب الـموت ميردنه
مـثـل عـابس تجـنـن بيك واحدنه
وبهل دنيه غيرك كلشي ماعدنه
لطمنه عليكم يدوم ونجي المرقد المظلوم
وألك جمره على الفطره
نموت بحب الحسين
نـضـحـي أرواحــنه ومهـما يلومونه
هـيـهات الـخـصــم عـنـك يـبـعـدونه
نـشـامـه ونسحـگ الأخطار شافونه
ونجيك أزحوف غصبن عاليعادونه
فلا نرهم بلياك نموت ونحيه وياك
الكتب فكره على الفطره
نموت بحب الحسين
***
تـزورك شيعـتك وبحـبـك يموتون
ولجل زيارتك طـول العـمر يمشون
هـتـاف التضحيات بگبرك يرفعون
يظل هـذا لـطـمـنـه وخلهـم يلومون
عشگ بالدم كتبناه فلا ننسه حسيناه
نشم عطره على الفطره
نموت بحب الحسين
قصيدة رقم8
أهلا يا مـــحرم يا شــهر حزني
عٙيش ابلا وجودك ماني متمٙنِّي
................
أهلا يا مــــــحرم يا شـــهر دمــعي
ظمه ريِجك رويته بلطمتي لضلعي
أستفتح عزائك عالحـــــسين أنـعي
لأول يوم منك بصــــــــمتي ونِّي
...............
أول يوم من الســــــــنه الهـجريه
بأذان الفجر سٙجدٙة شُكُــر مـٙهديّه
واختِم سٙجدتي وانه أقره لطميّه
الشكر لله مــــــحرم أحيِّ وفٙقنِي
..............
أنه روحي غـــــرام حــسين أدٙبها
الكفيل ابچفّه ماي الخدمه شربها
ولأن تلطم اكيده فـــاطمه اتحبها
شكبُرها خــــــادم الزهراء تقبٙلنِي
..............
حٙـگ اتــــباهه اخدمه الغالي خلاني
جٙدٙد عٙقــــدي الحـسين ويه أحزاني
گال الشاعر (أني حــــسين سوّاني)
وأنه ( الـ لا شيٙ) بس مالاته سٙوّٙنِي
..............
محـــــرم من تمُر أشـــــعر إلي قــيمه
عسىٰ الله بروحي عاشورائك ايديمه
من اذكرٙك اختنگ بســــوالف الخيمه
جُود و چٙف نحر و مــــتون تخنگنِي
..............
المنـــبر صاحبي و زنجيلي و القـامه
عِشرتِي وياك ممــلوحه ابدمه الهامه
مو (عٙـشره) وٙلٙه (اثلاثين) أيـــــامه
طول اسنيني عــــــــاشوراء يملكنِي
..............
أشتريتٙك و الشٙره بس يــشتري الغالي
الحـــاضر انته و المــــــــستقبل التالي
مـــحرم عـــمري دونك لا مـــــيسوالي
اشرخُص عمري بدونك ميّت احسبنِي
...............
محرم والــ يِقِيمك تنـــــمحي اذنوبه
و بدفــتر (حبــيب) احروفه مكتوبه
السبــــــب هذا لأن حسين محبوبه
أنه المـــــغبوط لو خـــادم يسٙجلنِي
...............
محـــرم والحلم وأنه الطم ابصدري
ملك الموت يـقبضني وخِتٙم عـمري
قٙسٙم ما توب أسوي مـُٙجلس بگبري
بثوب الخدمه يوم أخـواني تدفِنِي
..............
أٙوصي أهلــي يوم الموت بوصــــيّه
دٙفنتي اتصـــير بالرٙوضـه الحُسينيّه
ويّه (التُربٙه) خٙلّو وياها تٙــــــــرچيّه
أهديها لــ رّقيّه بـ يوم تــــــحضرنِي
الشاعر حاتم صبري الكاظمي
قصيدة رقم9
اول لياليك محرم هايه
للحزن بدلنه سوده الرايه
تحضرينه و نعلن اليوم العزاء
ويلي عالمذبوح نحره بكربلاء
نسوي لجلك يا حسين قرايه
*
كل مئاتمنه بدت هاي المسيــــــه
تحضرت تنصب عزاء ابن الزچيه
نادت بصوت الحزن كـــــل البريه
ويلي عالمذبوح بأرض الغاضريه
بكل زمان نظل نردد هل نداء
ويلي عالمذبوح نحره بكربلاء
نسوي لجلك يا حسين قرايه
*
الليلة أول ليله باليالي العشــــــر
خل نون عالداسته خيول الكفـــر
شچم ضلع لحسين بالطف ينكسر
حكهه لو ظلت تون ام الخـــــــدر
لمصيبتهه تون حته السماء
ويلي عالمذبوح نحره بكربلاء
نسوي لجلك يا حسين قرايه
*
هاي اول ليلــــــــة يا عالم مصيبه
بت علي باچــــر تره تصبح غريبه
يا حسرته ولوعته اليفگــد حبيبــه
بعينها تشوف الجثث بالدم خضيبه
عالشريعه نذبح شيال الواء
ويلي عالمذبوح نحره بكربلاء
نسوي لجلك يا حسين قرايه
*
الليلة اعظم ليلة مــــــــرت عالزچيه
تون على حسين وعلى العباس اخيه
و البعد اعظم واشد من كــــــل رزيه
عالهزل راحت غصب زينب ســــبيه
ظل متنها من الضرب ينزف دماء
ويلي عالمذبوح نحره بكربلاء
نسوي لجلك يا حسين قرايه
*
باچر أطفال الحسين بلا حمايه
ويالغرب يرحون عالهزل سبايه
جود كافلهم تبده بسهم مايه
عالنهر چفينه ماكوا بيها رايه
بالسبي يشوفون لوعات وعناء
ويلي عالمذبوح نحره بكربلاء
نسوي لجلك يا حسين قرايه
*
حسين الفيصلي
قصيدة رقم 10
يامحرم ياشـهر احـزاني يامحرم مانسـيتـك انـي
يامحرم الك والله امتاني
-------------------
انه من زغري حسيني هذا شاني وافخر
امـي مـن جابتـني چـانت لازمه بالمنبر
بالـطلگ صـاحت حسـين وياعـلي ياحيدر
ابچيت من انه اسمـعتها وبعد لا ما اگدر
يامحرم تعرف البچاني* * يامحرم مانسـيتـك انـي
يامحرم الك والله امتاني
-------------------
الهالشهر مو هسه عشگي گبل ما انه انفطم
چنـت ماتـغفه عـيوني انـه الــه اسمـع لطم
اهــلي مـيرضـوني ابـدن والله لمـن انهـظم
وبس يحلفوني بحبـيبي ارضـه اورجع ابتسم
يامحرم ساكن بوجداني يامحرم مانسـيتـك انـي
يامحرم الك والله امتاني
-------------------
الـسنه يـوم بيوم احـسب انه گـظيت العـمر
والشـهر عاشور عـمري كـله خلـصته انتظـر
تبــتدي احـزاني لمـَن تنتهـي ايـامه وتــمر
العاشر ايعيش ابكياني وكون كل لحظه انطبر
يامحرم كلمك شرياني يامحرم مانسـيتـك انـي
يامحرم الك والله امتاني
-------------------
عن الاعوام الي فاتت عنـدي صوره باقيه
للطـَم مشـتاگ انـي وللـطـبخ والــتعزيه
موكب الزنـجيل احـبه وذكـرياته الـماضيه
والمـشي بالاربعين اويه الجموع الماشيه
يامحـرم كربله عـنواني يامحرم مانسـيتـك انـي
يامحرم الك والله امتاني
-------------------
الخدمه بس بيك اعرفتها وصار اسمي الخادم
وبـخدمتي لبـو اليمه احـسدني حـتى العالم
اتنـدمت سـئلونــي مـره ? گلـت لامـانادم
الـگالي نـدمـان انــته هـذا قطـعا واهــم
يامحرم خادم ومـتفاني**يامحرم مانسـيتـك انـي
يامحرم الك والله امتاني
-------------------
بخدمتي حسدوني اهلي وصحبتي وكل ناسي
خدمـة حسـين ابو اليمـه تـاج شـلته بــراسي
اتعلـمت هالخدمه انـي امـن الـگمر عــباسي
خــادم حسيـن ابـقه اني الـحد گـطع انفاسي
يامـحرم لاتهـاجر ثاني يامحرم مانسـيتـك انـي
يامحرم الك والله امتاني
-------------------
بيك ابو اليمه اذكـره من بـقه عالغبره
والخيول الاعوجيه هـشمت لــه صدره
وعالهزل راحن سبايه كل بنـات الزهره
انه ما انسه الطفوف بگلبي خلت حسره
يامحرم لو نسيت انساني يامحرم مانسـيتـك انـي
يامحرم الك والله امتاني
-------------------
تمت والحمد لله
خادم الحسين حيدر تركي الكربلائي
تعليقات
إرسال تعليق