قصيدة رقم 1
بالشعر راسم صور «» بيــن زينب والكَمـرأقره الحروف
ركز اوشـوف
......................
تلكَه أول صوره راسم بيهه دكَ صدره وكفل
خله زينب وسط عينه يوم لرض الطف رحل
غطـــه هودجهه أبلوائه وجابهه بزوده البطل
لحظــه ماعــاف العقيلـــه ونعـــم يابوالفضل
ظل يصر امن الشمس «» لختـه ويضحــي النفس
برض الطفوف
ركــز اوشوف
.....................
صــــوره راسم للعقيله ابيـــوم وصلت نينوه
تحجي وي كافل ضعنهه ابخيمته كَعدو سـوه
اتكَله ياحماي خــــدري يالأعـــــز امن الهوه
خاف نتفارك يخويه ويطفه من عيني الضـوه
اشلون لوحال القدر «» بينــي مابــين البـــدر
ابقه بالخوف
ركز اوشوف
........................
صوره من جرد حســـــامه وحشم أليوث الوغه
طلبت الحـــــــره اوطلبهه لازم ألهـه انحققه
كلهه طلعت للشــــريعه اي ولاواحد بقــــــه
وضل ابو النومــاس يهتف آنـه ادعو بالسقه
بيده رافــــــع رايته «» جــاب ماي ابجــــربته
زوده معروف
ركــز اوشـوف
.....................
راســــم ابحق الشجــاعه والبـساله والعزم
صوره للعباس مـن طب كَطع اركَاب الزلم
بيهه صوت الحــــره ناده يابو فاضل ونعـم
واللـــــه وفيت الأخـــوه يبن حيــدر ياشهــم
صوره راســــم للعلم «» مرتفع فـــــــــوكَ الخيم
رفعته اجفوف
ركز اوشوف
......................
اجــت يـم عبـاس زينب بالمــــدامع حـاجته
بالحسيـــن وآل بيتــــــه مايقصــر وصــــته
اتكَله رد اجيوش اميه وعيد ابوك اوضربته
كَلهه عد عينج يزينب هسه اشــوفج صولته
ظلمه صارت كربله «» طبهه ابن عقد الوله
شت الصفوف
ركـز اوشوف
*******
الخادم
كامل السعيدي
قصيدة رقم2
أجيتك يا أخو زينب اووكفت ابدمعتي ابابك
أجيت اشكيلك همومي واعفر خدي بترابك
...........................................
أجيتك يا أبوفاضل وروج الدمعة بعيوني
أجيتك والكلب ساجر واشكم حسره بظنوني
وطحت يم عتبتك أنحب والوادم يشوفوني
واشم ترابك الطاهر عبير وانه بشجوني
ولبست اثيابي اذنوبي يالسلبوهن اثيابك
........................
مهظوم او عتب عندي وملجوم اوجرح بيه
ويمك ياضوه الحاير كبل جابني رجليه
وانه البس بالدعه ايمدهن والك مديتهه ايديه
يالتعرف شكو بكلبي تعال اسمع نواعيه
وجنسيتي حسينيه وأحب الحبو احبابك
........................
أجيت بحاجتي اتنخه وكلت يم بابك احجيهه
شكلت ياقاضي الحاجه أذبهه لو أخليهه
بس انته يخو زينب دمعتي ابابك ابجيهه
وحته حسين كال النه الحوائج أنته تقضيهه
كريم وجيت الك سائل وغسلت بدمعتي اعتابك
........................
أول ما لفظت اسمك بجيت اودمعت عيني
واحس يتراجفن كامن شبيهن مدري جفيني
دخيلك يا أبوفاضل واكف لاتخليني
يابحر انكشاف الضر ردت بس كطره تسكيني
وارجع مرتوي لداري يالذبيت مشرابك
...........................
وانه ادري الكصد بابك أبد لا مايرد خالي
معقوله ارجع مأيس ولا تنطيني يالغالي
وارد ابكسرة الخاطر وبس الدمعه تبرالي
لا والله يبو الغيره أبد متخيب آمالي
وانه الكضيت كل عمري أون والطم عله مصابك
.........................
يمن يدعي السبط باسمك ورأسآ ينكشف ضره
استغيث بحركة جروحي واعالج كوه بالحسره
عليك بكطعة المنحر وعليك بفاطمة الزهره
عبدك واكف ابابك يتأمل فقط نظره
وادري وياي متقصر ياللي العالم يهابك
.......................................
علي صابر السراي
نسألكم الدعاء
قصيدة رقم3
دمعة هظم أبجيهه وقصة عتب أرويهه
وجلمة الجرح يحجيهه من نار الخيام
.........................................
يالغافي بعيونك سهم صله الدمع بعيوني
ويالطاحن اجفوفك وفه السوط انطبع بمتوني
تقبل يبن حامي الحمه عدوانك ايضربوني
ومن انتخيك وأنتحب ياكافلي يشتموني
ياقائد الوفايه وين الوعد والرايه
يالمنطي سكنه احجايه ترجع للايتام
.........................
أتعثر بخيل اوجثث لمن أجيت اشكيلك
ولمن أطيح اعله الترب أتعذب او ابجيلك
عن قصة رماد الخيم جيتك يخويه احجيلك
وين الجفوف اوهيبتك ياوسفه رايح حيلك
جيت ابدموع ايتامك وبيدي بقايا خيامك
وسفه وكع صمصامك وي كل الاحلام
...........................
جيتك حبي للمشرعه يااباالفضل محنيه
من عد رقيه يالكمر جيتك اكول وصيه
كالتلي كليله شكلت من جرو الترجيه
يااباالفضل يااباالفضل بس مايرد اعليه
من الأذن جروهه واعله الوجه ضربوهه
وكل الخيم حركوهه يمطرز اسهام
...........................
وانه تشب نار الخيم يااباالفضل بذيالي
ومحتاره اطفي خيمتي أركض ألم عيالي
بهاللحظه ياخويه وكلت كون انته هسه اكبالي
واتذكرت ذاك الحمه وعزك يخويه الغالي
ذاك الخدر والهيبه من بعده خوف اوريبه
ونار او ألم وامصيبه ويتوذر ايمام
.........................
يالما ألي بجيتك أمل ضاع العمر واسنيني
وضلن جروحي اوحسرتي ودمع الحزن واونيني
ياابو الخدر ضاع الخدر يالماشي ومخليني
واكبالي أنظر عالثره كطعو وريد حسيني
أنحب واون مجروحه وكمت احسد المذبوحه
شله البشر وي روحه لوعمره ينظام
.............................
يااباالفضل كوم الكفر نمشي بيسر يردونه
وبحبال مابين الخلك ياوسفه وايجرونه
وفوك الهزل يمشي الخدر لارض الغرب يسبونه
ومن نندبك ياكافلي يشتمونه وايضربونه
يوم الدمع مصباحه يخلص ضرب وانياحه
وياويلي من ارماحه من نمشي للشام
......................................
علي صابر السراي
نسألكم الدعاء
قصيدة رقم4
طاح طاح عباس الكمر
طاح طاح عمي اعله النهر
..........................
ركضت من حركو الخيمه عليه
أنه مدللة ابو فاضل رقيه
شفتهه النار بذيالي سريه
وكمت أركض واطفيهه بديه
نار نار وانه بحيرتي
نار نار حركت عمتي
............................
ألطم عالوجه بجفوفي الاثنين
واصيحن ماتجي يابويه يحسين
راسك وين بويه اومنحرك وين
ترفات اوجمر جوالي رجلين
آه آه ضل بس منحرك
آه آه مامش خنصرك
..............................
جثث وادموم خيل اونار الطفوف
وانه لصوب النهر وداني الخوف
اعثرتلي بشي واعاين لنهن اجفوف
وشفت عمي وسهم عاميله الشوف
كوم كوم ياراعي الشيم
كوم كوم حركوهه الخيم
.............................
أنه موجود وانتي تحركج النار
جريلي السهم يابنت الاطهار
بجرح الهامه عمي بعينك احتار
السهم اجبير وانه اجفوفي ازغار
نام نام فدوه لدمعتك
نام نام زينب عذرتك
......................................
علي صابر السراي
نسألكم الدعاء
(كروب مؤسسة منبريون)
https://t.me/joinchat/Dw92Dj9pmspPx7OpNRYqtA
قصيدة رقم5
يعباس تبدت أمنياتي
يعباس بقت بس ذكرياتي
يعباس بعد شلي بحياتي
.........................................
يعباس من رحت واتشيع الصبر
والاطفال بالخيم تسكيهه تنتظر
والكلوب تلتهب من حرهه جن جمر
مشه وياك كل نفس يالماخذ العمر
بالخيام بقت سكنه حزينه
بالدموع تناشد عمي وينه
يعباس حرت وي نايباتي
..........................
ولا اجيت للخيم ياخويه يالكمر
صدك عود ياشهم توكع على النهر
تره حسين من رحت ظهره وعلي انكسر
بالجروح والكلب ظل ياكل القهر
أناديك ولا يرجع جوابي
صحت صوت ولاتسمع عتابي
يعباس كمت أدعي بصلاتي
.........................
يبو الزود للنهر متعنيه بالألم
شفت جود بي سهم وامترب العلم
وعله العين ياوسف متوسط السهم
وانه جيت اشتكي من حرك الخيم
يكفال يمن زودك حلالي
أويلاه وسف طايح يغالي
يعباس يريت اتحل وفاتي
...........................
بالسياط والكلب نيرانه مضرمه
والمتون يانفل يتسايلن دمه
والجدام لوهون تتحير السمه
بالدموع من صحت يايمه فاطمه
بالجروح صحت يالكافل اختك
ألي كوم تعنيت اوندهتك
يعباس تره النار بعباتي
............................
يضرغام يانفل عالغبره منطرح
عالخدود من صفع ظل منطبع جرح
تره حسين هم وكع بس راسه منذبح
ويلجمون هالكلب من يصعد الرمح
دوت نار بالخيام السليبه
وانه بقيت عكب عزكم غريبه
يعباس بعد راحت غلاتي
.............................
يريدون لليسر نتعنه يانفل
والجفوف تنجرح من ينجر الحبل
بالآهات والهظم وانرافك النذل
والايتام تنتحب ياخويه عالهزل
اليسر حيل يجرحنه بعذابه
وعالتراب ننام ابنص خرابه
يعباس ردت يمك مماتي
............................................
علي صابر السراي
نسألكم الدعاء
▪️قصيدة رقم6
وين رايح. ......منهو أولى مني ياگمر
وين رايح. ......گلي اذا اخوك النهر؟ ؟؟
ومن كلت رايح بعد
كل جرح بيه كعد
وين رايح. ..........وين رايح
..... ............... ............... ..............
من ودعتك مدري شبيه
عباس شبيهن رجليه؟؟
بس ﻻجنت انته العوجيه
من عندك خليلي شويه
محد غيرك يرهم ريه
وين الگه ابهاي الحنيه
خويه تدري.......من كتلي رايح...اعطشت
خويه تدري........ابروحتك شفت الطشت
وروحي ماتت بالجسد
كل جرح بيه كعد
وين رايح.............وين رايح
.............................................
من شفتك رايح لو تدري
صار اشگد ما حاسب عمري
اول مره آنه اكمش ظهري
ما ادري يعرفونك عطري
يافانوس لدربي وسهري
چفینك خل يبنن گبري
انتظرني...... خويه خل اشبع هوى
انتظرني. ......الضوه ايحب الضوه
ترجع انطيني وعد
كل جرح بيه كعد
وين رايح............وين رايح
.................................................
من زغرك بيه موصينك
وماسامع بس العد عينك
ما ادري اعليمن ثلثينك؟؟
هنياله المخلوق ابطينك
ولو لسه الحب نحر حسينك
چا حبك انته بجفينك
ردت اكلك.......ابقى مو محتاجلك
ردت اكلك. ... ..يمي بس مشتاكلك
شوكي الك ﻻ ما ركد
كل جرح بيه كعد
وين رايح.. .......وين رايح
................................................
ترضاها شلون ابقى ابدونك
يلچنت احلف بس بعيونك
لونك مايشبه بس لونك
بفراگك چتاله شلونك!!!
وبس ﻻ ايتامي يبجونك
خايف تگطع حتى متونك
يبو فاضل........صح اخو جنت انته الي
يبو فاضل. .......بس احس يمي علي
خويه لتخليني ابد
كل جرح بيه كعد
وين رايح. .....وين رايح
....... ..........................................
عوف الماي ولضويله
اليعطش يشرب بس تحجيله
زينب تحتاجك كل ليله
يلزم بيك البايد حيله
و رد لعبدالله ولوليله
يكبر جنت انته التدعيله
خويه ردلي..........بعد ساعه عل السبي
خويه ردلي.........قبل ﻻ يبجي النبي
منهو يبقالي سند
كل جرح بيه كعد
وين رايح.........وين رايح. ..
..................................................
/ احمد ماجد الكﻻبي
قصيدة رقم7
على راگ الشريعه تبدت الخوه
وخيعونه النهر من عندك تروه
شكثر منك غرف شبع غيره وشرف
_______________
اجيت وحسبت چفينك ويــاك
چفك ليش وسط الخيل عافاك
سألـت اليمنه گالت طايح هناك
سمعت اليسره خويه تصيح اهواك
يسرتك عاشــگه وما تغفه بالليل
تواسيك بجرح وبسحگت الخيل
يدمعك ونذرف شبع غيره وشرف
_____________________
چبيره سنين عمرك موش الاعوام
سنيـــنه ازغار بس كبار الاســـهام
نايم وانه اجيت بگلــــــب محتام
چـــــــنت زغير شو ما تقــبل تنام
تنام الدنيه كلها وانته سهران
خايف لو يفز حسين عطشان
الخدر عاش بترف شبع غيره وشرف
_____________________
گــــــوه الگاع ظلت تثبت ويـــاي
بحيث انه وصلتـــك هيـــچ بهداي
شويه النهر يمك وانته الهــــــــواي
بعت كلشي وصحت لحسين شراي
يالخــليت ركن الجيش مهدوم
حتى وانته طايح خايفه الگوم
الهوه شمك نضف شبع غيره وشرف
_______________________
بيني وبين جسمك صارن امتار
بس حسيت تلهب و الجسم حار
مثل باب الزچيه براســــك النار
بس عندك رمح وهناك بســـمار
مطشر وذر جسمك والاحساس
گلي شلون المك خويه عبــاس
يحير الي وصف شبع غيره وشرف
___________________
شبگتك وانه احس الكون مكتول
وذكرت ايام مــــهدك والدللــــول
عگبك يا كفـــيلي بالسبي وچول
ضعني يريد مثلك خويه مسؤول
يبو ضعني وكفيلي وصدر مدگوگ
الجنود تگلي ضعنچ يدخل السوگ
الاسف منك اسف شبع غيره و شرف
عبد زينب
محمد الإبراهيمي
قصيدة رقم8
ردت الدنيه امس....دخل رداد الشمس
گمر گمر..يبو فاضل..گمرگمر
*********
شدعوه كلك مستعد..خلي بس مهرك يهد زايد بصولاتــه
انته جيش الوحدك..لازم تردلك فــــدك..يوجع بطگاتــــــه
کلهه صاحت مو بشر..گمت من تنزل مطر..تکتل حچایاته
الرایه بیدك من تهز..گامت الموته تفز..انخلسو بصیحاتـه
والحچي صاير همس....دخل رداد الشمس
گمر گمر..يبو فاضل..گمرگمر
**********
شما يقدمون اسلحه..انته بيدك فاتحه..بويه كـــــف زنــــــوده
انه ما سامع سمع..ترتجف ضلع بضلع..الدنيــه صارت سوده
الدنيه گامت تنقبض..خلصت حـته الارض..واللسن معگــوده
یضبهه لمن ترتخي..حسين صاحاله اخي..والنعــــم من زوده
الوادم انخلست خلس....دخل رداد الشمس
گمر گمر..يبو فاضل..گمرگمر
*********
احنه لا مو خیبـــــره..جاي كلك حيــــــــدره..اصبر وحاچینــه
خفنه منك والنبي..الزلمه ضل يمشي حبــــي..ظلمتهه اعلينــــه
الخيل گامت تنشمر..گمر بعیون الفجــــــــر..والشمر چاوینـــــه
غضب بس اعله العده..بس ترف مثل النده..بسرعه تدمع عينه
وانقفل باب الحبس....دخل رداد الشمس
گمرگمر..يبو فاضل..گمرگمر
*********
الجيش ابد ما يفتهم..غير لازم ينهزم..الجيش مدري شماله
والنخل اصبح نوه..والهوه يگض الهوه..مخردل الخيالــــه
كلشي صاير يندمج..والزلم هم تنسرج..الجيش جر ذيالــــه
حته عزريل انتچه..ساكت ولا ما حچه..وين رايح بالــه
صارت الروس بفلس....دخل رداد الشمس
گمرگمر..يبو فاضل..گمرگمر
*********
هل اتى لا بل اتى..حيدر وانته فتــــــى..هيبته وتصويـــــــره
الجيش سولف ما يلي..ادري چم واحد علي..والله بلوه وحيـره
انته بس انته الشهم..والحسن رب الزلم..الزلم يمه گصيـــــره
واگف بطول الدهر..وبللت حته النهــر..اشكثر شايل غيـــــره
من الحرب گامت تنس....دخل رداد الشمس
گمرگمر..يبو فاضل..گمرگمر
عبد زينب
محمد الابراهيمي
قصيدة رقم9
حـوار بين العقيله زينب وابو الفضل العـباس (عليهم السلام) نعـــي
***********
جـربته اوسيفه كل ملكه وجــاهه
اكتـــار الحـومه بجفوفه وجـــاهه
تنخــــت بيه بـت حيـدر وجـــاهه
أطلبي ايصيــح يابنت الــــــزجيه
تكَله الحك علّي بلماي اطفال حسين عطشانين
دوت بكَلوبهم نيران ألحكَ يـاعضيد حسين
وذا مايصح شرب الماي اسكَيهم دموع العـين
يكَلهه الماي شنهو الماي هسه ابزودي اجيبنه
اجر شاطي النهـر بحبال وحكَــج ألـه اذلنـه
اجيبه الخيمتـــج يختـي وروي اكَلــوبكـم مــنه
تكَله اونعـــــم يالــوفاي اعرفك توفـي بوعودك
مهــــيوبه اضل للــدوم يـاعبـــــاس بوجـودك
لاجــن شنهـو بيه ايصير من ايطيحن ازنودك
يكَلهه مــن يطيــح ألــــواي يـازينب اعذريني
أخـــافن الــج ما احضــر يحـــره مـن تندبيني
مفضوخ ابعمد عالـراس وتنصاب ابسهم عيــني
تكَله اشلـــون اصبر الـــروح يـاعبــاس بغيــابك
شكَل ليتــــامي لوندبــوك ونته امفــارك احبـابك
يـاهو ايقمض اعيونك اوياهو ايشدلك اصوابك
يكَلهه اتوســـد التـــــربان ووصالـــي يكَطعوهه
ويحركَون الخيــم بنــار وطفالــــي يضربوهه
وبــدرب اليسـر تمشـين وجفوفـــــج يشـدوهه
تكَله وسفه ياعباس هـــــاي اشلـــون ترضاهه
اروح اميسره الشــــام ونـه جــدي النبــي طــه
ألـي امفــاركَه الخـوان كَلــي اشلــون ممشاهــه
يكَلهه هل قــدر مكتــوب يخـتي بأمــر باريــنه
بــي واعــدني حامــي الجـار يعلم باليحل بـينه
اجرعـي امصابنه ابصبرج يزينب من تشوفينه
تكَلـه الصبـــر يـاعبــاس كَلــــي امنيــن اجيبنه
أوكَلبي ألجمته الوعات يخــويه بيش اصبـرنه
اعيش أمعـذبه بجفــاك يخــويه وأجــذب الــونه
دخيلــــج كَلهه ياحــــوراه ابونـــج لاتعذبيني
وذا ونيتـي يخـت حسين ابهـيده اولا تسمعــيني
تــره بيه تشب نيـران ونتــي ابهـــاي تــدريني
تكَله ياكَمــر عــدنان هــــايه ويـــن چـانتلي
اروح اميسـره اليـــزيد وبالطف تنذبـح أهلـي
يريت ابكربله اوياكم صبح يابو الفضل كتلي
يون الكَلــب محــد سمـــــع ونتاه
اوضعنه عكَب راعي الشيم ونتاه
رحـــت مسبيــه ياعبــــاس ونتاه
ذبيـــح اعله النهــر بالغــاضريه
ـــــــــــــــــــــ
الخادم
كامل السعيـدي
قصيدة رقم10
صبرا يبت فاطمه. لامايمسج ضمه
راح اجي وبجفي ماي. ضمي دمعج خويه جاي
...........................................
واعدتني وهذا يومك .. بيهه تشهد كل هلي
من المهد شدينه رايه .. اثنينه براية علي
حيدره مابين اخوتي . رادك انت كافلي
واقترن اسمي وي اسمك. يلي طولك خيمه الي
وانخط عهدنه سوه. بيدك يرف اللوه
انت روحي وكل ضواي. ضمي دمعج خويه جاي
............................
يلكبرت اكبال عيني ... وانه أعاين زهرتك
يكبر اكبالي غصنهه .. وبيهه تكبر رايتك
من دمع عيني سكيتك .. خويه وانطر وكفتك
مادريت ادموع عيني .. تبوك مني شوفتك
من شفته عودك كبر. امنيتي الغي النهر
خيمة الي انت ولواي. ضمي دمعج خويه جاي
........................................
خويه بعيوني سوالف. شما اسكتهن يجن
تدري بعيوني يتامه. لو أغمض ينتهن
وانه بين أيتام غالي . وبين طعنات الزمن
خويه يا عباس أندبك. دارت اعليه المحن
اندب يرد الصده. ياهو اليرد العده
للسبي اخر مناي. ضمي دمعج خويه جاي
.....................
خويه حكي لو ندبتك .. منك انه اطلب عذر
بس اجت عين الشماته .. تضحك ابوجهي وتمر
خويه لو تسمع حجيهم .. كله ياخويه زجر
للشمر ياخويه صحتك .. توكف بعين الشمر
وسياطه فوك المتن. وبسكته عنه اون
بالشتم ينده وراي. ضمي دمعج خويه جاي
..................................
تالي ما تالي أعوفك ... خويه ضامي أعله النهر
من عمت عين الليالي .. وعميه عينك يادهر
مادريت أصواب نحرك ... ينتهي بهذا القهر
ماغفت عيني بغيابك.. خويه عاشرهه السهر
يل جنت الي عاطفه. غيره وكرامه او وفه
يمته جا تروي ضماي. ضمي دمعج خويه جاي
خالد العلمي
قصيدة رقم11
من ماتوا الأودهم دنيه شني بعدهم
بس عالنهر اشوفن من ينذبح وردهم
&&&&&&&&&&&&&&&
كل الاحبهم سافروا بلا شبكه ودّعوني
ياروحي موتي امن القهر راحوا ولايجوني
لا لا تموتون واضل ويّه المشوا خذوني
صوركم يبعد رويحتي هالنايمه بعيوني
من ينحفر كبرهم يعني انتهه عمرهم
اعزاز الكلب يوادم راحوا بعد شيردهم
&&&&&&&&&&&&&&&
فكد الاوّده ياخلَك حته الظَهر يكسره
بهدومه يامحله الشبك لمن اشمّه عطره
امنيتي محبوب الكلب يرجع الي وانظره
امنيتي افك باب الكبر ويّاه انام بكبره
نومة كبر سوية نتقاسم المنية
ياروحي ابقي حلمي ماينفتح لحدهم
&&&&&&&&&&&&&&&
آنه البكيت ابلا اهل ذاك الابو فكدته
حسين ابو كلب اليحن اتونس بضحكته
مومثل يوسف مارجع ثوبه ولاشبكته
مومثل اختي ماشفت راسه التبوسه بنته
رحميني يالليالي ماضل اليّة غالي
ماتت جزع رقية فكد الابو اشدهم
&&&&&&&&&&&&&
ياموت كافي امن الهضم لاتاخذ الاريده
ماانسه من نمشي سوه يلزمني وايدي بيده
سيف الشمر خل يبتعد لاياكل بوريده
اليفكد مثل هذا الابو كلّي العمر شيفيده
من ينذبح حبيبي ماينكطع نحيبي
ابجي قهر يكلبي ماينحمل بُعُدهم
&&&&&&&&&&&&&&&
تتيتم افراحه الّذي ينظر كبر خليله
عل جانوا العيني ضوه ابجي الدمع واسيله
باجر تسولف جم ذبح لمّن تجي العقيله
رحمتكم شويه عله بنيتكم العليله
خل اعمه بالبواجي ماضلت التراجي
يمته تجي يمهدي اترجع الي شهدهم
&&&&&&&&&&&&&&&&&&
كل فاتحه تكظي بعجل يالمهدي وانت تدري
بس فاتحتنه اويه العمر عاشور صاير عمري
الرضوه اروحن لوطوى يمك اصبّه قهري
من فاركت اهل الوفه ارحم الية كبري
من تبعد الحبايب خل اغفه بالترايب
بهالدنيه جنّة الية صبري انتهه بفكدهم
محمود البراك
تعليقات
إرسال تعليق